Համայնքների խոշորացմամբ փոքր բնակավայրերի մեծ խնդիրը չլուծվեց․ հարյուրավոր գյուղեր տրանսպորտ չունեն
Համայնքների խոշորացման գործընթացի առավելություններից մեկը, որի մասին շարունակ խոսում էին իշխանության ներկայացուցիչները, լինելու էր այն, որ միավորումից հետո բնակավայրերը պետք է տրանսպորտային կապ ունենային համայնքային կենտրոնների և մարզկենտրոնների հետ։ Սակայն այս խնդիրը շարունակում է մնալ չլուծված հարյուրավոր բնակավայրերի բնակիչների համար։
Լուծումը դրված է մասնավոր ընկերությունների վրա, որոնք էլ ոչ շահավետ լինելու պատճառով շատ ուղղություններով ուղևորափոխադրումներ չեն իրականացնում։ Արդյունքում, հազարավոր մարդիկ շարունակում են ապրել առանց հանրային տրանսպորտի, խոշոր քաղաքներից կտրված։ Նրանք գյուղերից քաղաք հասնելու համար ստիպված են օգտվել տաքսիներից։
Համայնքներ կան, որ արդեն 9 տարի է խոշորացված են, բայց հանրային տրանսպորտի խնդիրը լուծված չէ։ Ավելին, 2018 թ․-ին կառավարությունը խոստացել էր խնդրին օպտիմալ լուծում գտնել, բայց դա էլ չեղավ։ Իսկ խոշորացված համայնքների ղեկավարներն ասում են՝ ոլորտը իրենցը չէ, լավագույն դեպքում կարող են 1 կամ 2 միկրոավտոբուս գնել և կազմակերպել ուղևորների տեղափոխությունը։
