Աշխարհին պետք է, որ միջանցքը բացվի, Հայաստանն էլ Իրանի հետ ընդհանուր սահման չունենա. քաղաքագետ
Ադրբեջանը նոր պահանջներ է առաջ քաշում, ինչը նշանակում է, որ իրենց ծրագրերում այս պահին խաղաղության հարց չկա: REGIONS TV-ի հետ զրույցում նման տեսակետ հայտնեց քաղաքագետ Արմեն Բաղդասարյանը՝ անդրադառնալով Հայաստանի հասցեին Ադրբեջանի նախագահի հնչեցրած վերջին սպառնալիքներին:
«Այս պահին Արդբեջանին խաղաղության փաստաթուղթ պետք չէ, որովհետև իրենք իրենց ուզածը ստանում են առանց որևէ համաձայնագրի: Հենց հասկանան, որ էլ ստանալու բան չունեն, այդ ժամանակ կնստեն, համաձայնագիրը կստորագրեն, ընդ որում, իրենց ուզած տեսքով, և այն, ինչ չեն կարողացել ստանալ, կփորձեն ստանալ այդ պայմանագրով»,-նշեց Բաղդասարյանը:
Այսպես կոչված միջանցքի հարցը տարածաշրջանային հարցի է վերածվել, և ըստ Բաղդասարյանի, Հայաստանն այստեղ էլ արդեն հետքայլ արել է։
«Սկզբում ասում էր՝ կարմիր գիծ է, ընդհանրապես քննարկման ենթակա չէ, հետո ասացին՝ պատրաստ են պարզեցված կարգով անցում տալ, Ալիևն էլ ասում է՝ մեզ պետք է անցնել առանց որևէ ստուգման»:
Քաղաքագետի համոզմամբ՝ միջանցքի հարցը օրակագիրց դուրս չի գալիս աշխարհաքաղաքական շահերի պատճառով։ «Աշխարհին պետք է ոչ միայն, որ այդ միջանցքը բացվի, այլև, որ Հայաստանն Իրանի հետ ընդհանուր սահման չունենա»,-ընդգծեց Բաղդասարյանը:
