Հրդեհվել է այն մարզադահլիճը, որտեղ մարզվում էր Վարազդատ Լալայանը․90 տարվա այս շենքը, որտեղ չեմպիոններն էի պարապում, երբևէ չի վերանորոգվել

Այս պահին մարզադպրոցի գույքը տեղափոխվել է այլ տարածք, պարզ չէ՝ թե որտեղ են պարապելու մարզիկները

Փետրվարի 9-ին Գյումրիում հրդեհվել է Շիրակի պետական համալսարանի  ֆիզկուլտ բազայի շենքը, որտեղ մարզվում էին  նաև Գյումրու մանկապատանեկան համալիր մարզադպրոցի սաները։ Շենքն ունի 2 մարզադահլիճ՝ ծանրամարտի և սամբոյի։ Այստեղ էին մարզվում գյումրեցի չեմպիոնները․ Վարազդատ Լալայանը, Ալեքսանդր Լազարյանը և այլոք։

Հրդեհվելուց օրեր առաջ, REGIONS TV-ն նկարահանումներ էր կատարել այն մարզադահլիճում, որտեղ մարզումներ էին անցկացնում ծանրորդները, պատմել էինք չեմպիոնների մարզման վատ պայմանների մասին։ Մեզ հետ զրույցում ծանրորդ Ալեքսանդր Լազարյանի մարզիչն ասել է, որ 90 տարվա այս շենքը, որտեղ պարապում էին ծանորդները, երբևէ չի վերանորոգվել։

Միջազգային մրցահարթակներում մարզիկների ամեն հաղթանակից հետո կառավարությունը շարունակ խոստացել է նոր մարզադահլիճ կառուցել, կամ շենքային պայմանները բարելավել, բայց խոստումն այդպես էլ չի կատարել։

Վերջին խոստումը հաջորդել է Վարազդատ Լալայանի մեծ հաջողություններին։

Նշենք, որ հրդեհը բռնկվել է սպորտային համալիրի տանիքում: Այն հիմնականում ընդգրկել է սամբոյի մարզադահլիճի հատվածը՝ մոտ 700 քառակուսի մետր։

Ըստ ՆԳՆ փրկարար ծառայության՝ այրվել են տանիքի փայտե կառուցատարրերից մոտ 300 քմ հատված, փայտե առաստաղից մոտ 150 քմ և ջերմահարվել է փայտե կառուցատարրերի մոտ 100 քմ հատվածը:

Շիրակի մարզպետի աշխատակազմի կրթության, մշակույթի և սպորտի վարչության գլխավոր մասնագետ Վաչագան Վարդանյանը REGIONS TV-ի հետ զրույցում նշեց, որ հրդեհի հետևանքով մարզահամալիրի շենքը հավանաբար  դարձել է վթարային։ Առայժմ չի թույլատրվում այնտեղ մարզումներ իրականացնել։ Իսկ գյումրեցի ծանրորդներն այս օրերին Երևանում մասնակցում են Հայաստանի հանրապետական առաջնությանը։ Նրանց վերադառնալուց հետո նոր պարզ կլինի, կթույլատրվի՞ հրդեհից տուժած շենքում մարզումներ անցկացնել, թե՝ ոչ։ Չթույլատրելու դեպքում միայն կսկսեն մտածել նոր մարզադահլիճ տեղափոխվելու մասին։

Այս պահին մարզադպրոցի գույքը տեղափոխվել է այլ տարածք, ծանրաձողերը՝ ևս։

Իսկ Գյումրու մանկապատանեկան համալիր մարզադպրոցը Հայաստանի կրթության, գիտության, մշակույթի, սպորտի նախարարության ենթակայության տակ է, հիմնվել է 32 տարի առաջ, Գյումրիում այն շատ հայտնի է։ Հայաստանի Հանրապետության վաստակավոր մարզիչ Կարեն Կարապետյանի խոսքով, մարզադպրոցը սպորտային բացառիկ ցուցանիշներ ու ձեռքբերումներ ունի։ Կարեն Կարապետյանը, ով ծանրամարտի օլիմպիական խաղերի փոխչեմպիոն, աշխարհի և Եվրոպայի չեմպիոն Վարազդատ Լալայանի անձնական մարզիչն է, ասում է, հայաստանյան ոչ մի մարզադահլիճ չի ունեցել այնպիսի հաջողություններ, որքան այս դահլիճը․ տվել է աշխարհի չեմպիոններ․ Տիգրան Գևորգի Մարտիրոսյան, Արա Խաչատրյան, Աղվան Մելիքյան, Ալեքսան Կարապետյան, Ռուդիկ, Ռադիկ Պետրոսյաններ և այլք։

Կարինե Կազարովա