««Զանգեզուրի միջանցք»-ի բացման գործընթացը արգելափակել են երեք ուժեր»․ Նագիև
Ադրբեջանի խորհրդարանի պատգամավորն անդրադարձել է այսպես կոչված «Զանգեզուրի միջանցքին»։
««Զանգեզուրի միջանցք»-ի բացման գործընթացը արգելափակել են երեք ուժեր»,-այս մասին գրում են ադրբեջանական լրատվամիջոցները։
Միլլի Մեջլիսի պաշտպանության, անվտանգության և հակակոռուպցիոն հանձնաժողովի նախագահ, պատգամավոր Արզու Նագիևը, ինչպես գրում են ադրբեջանակա ԶԼՄ-ները, «Զանգեզուրի միջանցք»-ի բացումը համարում է տարածաշրջանում խաղաղության հաստատման գլխավոր քայլերից մեկը։
Նագիևն ասել է, որ Զանգեզուրի միջանցքի բացումը Հայաստանի խնդրանքը չէ։
«Դա պայմանավորված է մի շարք պետությունների դիրքորոշմամբ՝ ընդդեմ միջանցքի բացմանը։ Ռուսաստանը, Իրանը և Հայաստանի մյուս հովանավորները այս հարցում հավատարիմ են միասնական դիրքորոշմանը։ Հենց այս համատեքստում պետք է որոշվի Զանգեզուրի միջանցքի ճակատագիրը, որը Չինաստանից Եվրոպա տանող ճանապարհի առանցքային հատվածն է»,-ասել է Նագիևը։
Ադրբեջանի խորհրդարանի պատգամավորը նաև նշել է, թե միջանցքի բացմամբ պետք է շահագրգռված լինի նաև հայկական կողմը․«Սրան հակասող ցանկացած մոտեցում կարող է ավելի սրել առկա լարվածությունը: Եթե խաղաղություն չլինի, և մյուս կողմը հրաժարվի կատարել իր պարտավորությունները, դա անխուսափելիորեն կբերի գործընթացի զարգացման տարբեր ուղղություններով։ Իհարկե, չի կարելի բացառել Ադրբեջանի և Հայաստանի միջև նոր առճակատումների ռիսկերը»։
