Կարեն Սիմոնյանը պաշտոնապես հայտարարեց, որ մասնակցելու է Գյումրու ավագանու ընտրություններին․«Հավակնում եմ քաղաքապետի պաշտոնին
Կարեն Սիմոնյանը քաղաքապետի թեկնածու է առաջադրվել «Մայր Հայաստան»-ի ցուցակով
Գյումրեցի գործարար Կարեն Սիմոնյանն այսօր պաշտոնապես հայտարարեց, որ մասնակցելու է մարտի 30-ին կայանալիք Գյումրու ավագանու ընտրություններին։
Կարեն Սիմոնյանը քաղաքապետի թեկնածու է առաջադրվել «Մայր Հայաստան»-ի ցուցակով
«Խորհրդակցելով ընկերներիս, թիմակիցներիս և բազմաթիվ գյումրեցիների հետ՝ որոշել եմ մասնակցել Գյումրու ավագանու արտահերթ ընտրութուններին՝ հավակնելով քաղաքապետի պաշտոնին։ Այս որոշումս ամրապնդվեց Գյումրին ազատ տնտեսական գոտի դարձնելու ծրագրի ստորագրահավաքի ընթացքում, որտեղ 7500 գյումրեցիներ աջակցություն են հայտնել և պատգամ, որպեսզի տեր կանգնեմ այդ ծրագրին»,-Ֆեյսբուքի իր էջի ուղիղ եթերում ասաց Կարեն Սիմոնյանը:
Թե ինչո՞ւ է ուզում ընտրվել Գյումրու քաղաքապետ, Կարեն Սիմոնյանը պարզաբանեց․«Ես, որպես գործարար, ինքնաբավ մարդ եմ։ Բայց չես կարող լիարժեք ինքնաբավ լինել, քանի դեռ Գյումրիում կա բարձր աղքատություն, և քաղաքը վերջնականապես չի ազատվել աղետի գոտի պիտակից։ Ես իմ մեջ տեսնում եմ կարողություն, որը օգուտ կբերի մեր քաղաքին»։
Նա հավաստիացրեց, որ Գյումրին ունի հսկայական պոտենցիալ՝ դառնալու զարգացող քաղաք։
«Իմ ներսի ու դրսի, բիզնես և քաղաքական կապերի շնորհիվ ես վստահություն ունեմ, որ Գյումրին ազատ տնտեսական գոտի, հարկային առումով ազատ քաղաք կարգավիճակ ունենալու դեպքում կունենանք հսկայական ներդրումներ, հազարավոր աշխատատեղեր, որը օգուտ կբերի Գյումրուն, Շիրակի մարզին և ամբողջ Հայաստանին»,-հայտարարեց Կարեն Սիմոնյանը։
