Ադրբեջանին պետք է Հայաստանի խաղաղության ձգտումը, որպեսզի պոկի առավելագույնը․ քաղաքագետ
«Չպետք է հուսալ, որ Երևան-Բաքու խաղաղության համաձայնագիրը ստորագրելուց հետո կլինի խաղաղություն»։ Այս մասին REGIONS TV-ի հետ զրույցում հայտարարեց քաղաքագետ Արմեն Բաղդասարյանը՝ անդրադառնալով խաղաղության համաձայնագրի շուրջ քննարկումներին։
«Պետք է այնպես անել, որ կամ ուժերի բալանսը վերականգնվի, կամ միջազգային այնպիսի իրավիճակ ստեղծվի մեր շուրջ, որ Ադրբեջանին պարզապես ստիպեն ստորագրել այդ համաձայնագիրը: Հետևաբար, Հայաստանի քայլերը պետք է միտված լինեն առաջին հերթին սեփական պաշտպանական ռեսուրսները մեծացնելուն և խելամիտ արտաքին քաղաքականությամբ այնպիսի իրավիճակ ստեղծելուն, որ ուժային բևեռներին ձեռնտու լինի խաղաղությունը»,-նշեց Բաղդասարյանը:
Քաղաքագետի խոսքով՝ փաստաթղթի ստորագրումը պետք է լինի արդեն իսկ կայացած խաղաղության գագաթնակետը և ոչ թե այդ գործընթացի սկիզբը։
«Ադրբեջանին խաղաղություն պետք չէ, պետք է Հայաստանի ձգտումը դեպի խաղաղություն, որպեսզի դա օգտագործելով՝ առավելագույնը պոկի Հայաստանից»,-ընդգծեց Բաղդասարյանը:
Նորություններ
