«Ասում են, որ վատագույն իշխանությունները ձևավորվում են ընտրություններին չեկած քաղաքացիների պատճառով»․ Լևոն Բարսեղյանը ներկայացրեց նախընտրական ծրագիրը

«Ամեն ընտրությունից առաջ մենք լսում ենք թեկնածուների խոսքերը, ովքեր փրկելու են քաղաքը կամ պետությունը, սակայն մեր թիմը, ոչ մի պահ չի սպասել ընտրությունների։ Մենք պատեհապաշտ չենք  ու ոչ մի անգամ չենք խոսել միայն ընտրություններից առաջ»,-այս մասին այսօր հայտարարեց Գյումրու ավագանու ընտրություններին մասնակցող «Եվրադաշինքի» քաղաքապետի թեկնածու Լևոն Բարսեղյանը՝ նախընտրական ծրագրի որոշ դրույթներ ներկայացնելու ժամանակ։

Նա ընդգծեց, որ իրենց թիմը չունի խայտառակ անցյալ, չկա որևէ բան, որի համար ամաչեն։

«Ասում են, որ վատագույն իշխանությունները ձևավորվում են նրանց կողմից, ովքեր չեն մասնակցում ընտրություններին։ Նախորդ ընտրություններին միայն 24%-ն էր մասնակցել։ Մեր ջանքն այն է լինելու, որ քաղաքացիները պատասխանատու լինեն քաղաքի նկատմամբ։ Մեր ծրագրերը չեն պարունակում անիրատեսական ոչ մի խոստումներ»,- ասաց Բարսեղյանը։

Քաղաքապետի թեկնածուն ներկայացրեց նախընտրական ծրագիրը՝ նշելով, որ այն բաղկացած է 12 գլխից։ Հիմնական նպատակներից մեկը քաղաքի համաչափ զարգացումն է, քանի որ մինչ այս կենտրոնական հատվածում է եղել հիմնական ներդրումները, իսկ ծայրամասերում քիչ փոփոխություններ են եղել․ «Մեր քաղաքում համաչափ զարգացման կարիք կա։ Մենք փորձում ենք մեծ ուշադրություն դարձնել ծայրամասերի զարգացմանը։»,- նշեց Բարսեղյանը։

Նա նաև շեշտեց, որ պետք է լուծում տալ մի շարք հրատապ խնդիրների՝ սկսած մանկապարտեզների անվճար հաճախումից, որն առաջարկվում է ներդնել երկրորդ ավագանու նիստից սկսած, մինչ՝ քաղաքում աղբահանության, թափառող շների խնդրի լուծումը։

«Մենք առաջարկում ենք հրապարակային հաշվետու, բաց կառավարում, չի լինելու որևէ գաղտնի, կիսաթափանցիկ, քողարկված, համացանցում մի այնպիսի տեղ դրած տեղեկատվություն, որը գտնելու համար 20-25 տարի է պետք»,- ընդգծեց Լևոն Բարսեղյանը։

Ավագանու և քաղաքապետի թեկնածուի ծրագրում կարևոր տեղ է զբաղեցնում նաև այնպիսի հարցեր, ինչպիսիք են՝ ներհամայնքային տրանսպորտի բարելավումը, փողոցային առևտրի կարգավորումը՝ քաղաքակիրթ շուկաների հիմնումը, և անվտանգության հարցերը։

«Մեր ծրագրերը բաժանված են երկու փուլերի։ Առաջին փուլում մենք վստահ ենք, որ մեզ որևէ արտաքին օգնություն հարկավոր չի լինի։ Երկրորդ փուլը, սակայն, ավելի բարդ է՝ պահանջում է պետական տարբեր աջակցություններ և ֆինանսական լրացուցիչ միջոցների ներգրավում։ Ժամանակի տեսանկյունից մեր խնդիրները ևս կարելի է բաժանել երկու խմբի։ Առաջին խմբի խնդիրները մենք նախատեսում ենք լուծել 5 տարվա ընթացքում։ Օրինակ, երկրորդ ավագանու նիստում մենք կսահմանենք, որ Գյումրու մանկապարտեզներում հաճախող երեխաների ուսումը լինի անվճար, քանի որ դա համայնքային ծառայություն է, բայց ներկայումս այն վճարովի է։ 9-10 տարի շարունակ խոսում ենք այս հարցի մասին, սակայն միևնույնն է՝ շարժ չկա։ Երկրորդ խմբի խնդիրները, սակայն, երկարաժամկետ լուծումներ են պահանջում՝ դրանց լուծումը կարող է տևել 10, 20 կամ նույնիսկ 30 տարի։ Բայց ամեն դեպքում, դրանք պետք է սկսվեն ինչ-որ կետից։»,- ընդգծեց Բարսեղյանը։

Նրա խոսքով, մեծ մարտահրավեր է մնում համայնքի եկամուտների ստվեր։ «Մոտավորապես 0.5 մլրդ դրամ չի մտել համայնքի բյուջե։ Մենք պետք է աշխատենք, որպեսզի այդ գումարներն օրենքով բերվեն և օգտագործվեն քաղաքի զարգացման համար»,- ասաց նա։

Այսօր ներկայացվեցին նաև ընտրացուցակում ընդգրկված անձանց ելույթները, որոնք խոսեցին իրենց հետագա ծրագրերից և քաղաքում իրականացվելիք փոփոխություններից։

Եվրադաշինքի 2-րդ համարը՝ Գայանե Գևորգյանը, շեշտեց, որ Գյումրու քաղաքացիները պետք է լինեն զգոն և հիշեն իրենց անցյալը։ «Տպավորություն է, որ ոչ թե իշխանությունն է ծառայում ժողովրդին, այլ ժողովուրդը՝ իշխանության թելադրանքին։ Վստահ եմ, որ Գյումրին ընտրություններին կմասնակցի զգոնությամբ, ու գյումրեցիների հիշողության բանկը հուսով եմ՝ սնանկ չէ։ Իմ քայլը մեծ պատասխանատվություն և ջանք է պահանջում։ Ես աշխատում եմ օրենքին համապատասխան, հակառակ դեպքում ոչինչ չեմ անում։ Բավականաչափ ձայներ ունենալու դեպքում, ես իմ մաքսիմալն եմ ներդնելու, որպեսզի ներկայացրած ծրագրերը կյանքի կոչվեն»,- ասաց Գայանե Գևորգյանը։

Իր հերթին, ավագանու թեկնածու Հրանտ Պետրոսյանը ասաց․ «Երկրաշարժից հետո մենք հասկացանք, որ անշարժ գույք գոյություն չունի։ Լևոն Բարսեղյանը մշտապես պայքարում է։ Մենք ուզում ենք, որ բոլորով մի թիմ լինենք։ Ինձ համար կարևոր է, որ ինչ էլ անենք, անենք միասին՝ որպեսզի կարողանանք նորմալ աշխատանք ապահովել»,-ընդգծեց նա։

Նաև, ավագանու թեկնածու Անահիտ Մկրտչյանն իր խոսքում նշեց, որ եկել է ժամանակը, երբ պետք է ոչ միայն ցանկություն լինի, այլ նաև գործելու կամք։ «Միշտ ուզել եմ, որ մեր քաղաքը զարգացած լինի։ Հիմա եկել է պահը, երբ ոչ միայն ուզելու, այլ գործելու ժամանակն է։ Մեր գլխավոր նպատակը Գյումրին ծաղկեցնելն է», – նշեց Անահիտ Մկրտչյանը։

Սյուզաննա Խառատյան