Բողոքի ակցիա՝ ի պաշտպանություն Բաքվի բանտերում ապօրինաբար պահվող հայերի
Կառավարության շենքի դիմաց, գործադիրի նիստին զուգահեռ, բողոքի ակցիա է՝ ի պաշտպանություն Բաքվի բանտերում ապօրինաբար պահվող հայերի։
«ՀՀ արտաքին քաղաքական գլխավոր օրակարգը պետք է դառնա հայ գերիների վերադարձը», -պնդեցին հավաքվածները։ «Գերիների հարցը ոչ թե պետք է դառնա երկկողմանի քննարկման առարկա, այլ նախապայման Հայաստանի և Ադրբեջանի միջև խաղաղության համաձայնագրի ստորագրման համար»,-հայտարարեց «Ապրելու երկիր» կուսակցության համահիմնադիր Մեսրոպ Առաքելյանը։
«Եթե նույնիսկ Հայաստանի կառավարությունը, ինչպես վստահեցնում են, լուռ աշխատանք տանում է գերիներին վերադարձնելու հարցով, այն փաստը, որ գերիները չեն վերադառնում, արդեն խոսում է նրանց անարդյունավետ աշխատանքի մասին»,-ընդգծեց Առաքելյանը։ Նրա խոսքով՝ կառավարությունն այս հարցը կարող էր լուծել նաեւ խաղաղության համաձայնագրի շրջանակում․ եթե միջազգային ատյաններից հայցերը հետ են քաշվում, ըստ Առաքելյանի, կարող է նաև ներքին հայցերի հետքաշման պահանջ դրվել, և այդպիսով հայրենիք վերադարձնել գերիներին։
«Հայաստանը միջազգային հանրությունից պետք է պահանջի հստակ պատժամիջոցներ սահմանել Ադրբեջանի իշխանության նկատմամբ, մասնավորապես այն անձանց նկատմամբ, որոնք ներգրավված են հայ գերիների առևանգման ու կեղծ դատավարության բեմականացման մեջ»,-ավելացրեց Առաքելյանը։
Ակցիայի մասնակիցները նշեցին՝ Հայաստանի կառավարության քաղաքականությունն է պատճառը, որ հայ գերիները հայտնվել են Բաքվի բանտերում։ «Նիկո՛լ, դու ես գերիներին հանձնել, դու էլ պիտի վերադարձնես, դու ես Արցախը հանձնել թուրքին, դու էլ պիտի վերադարձնես»,–հայտարարեց ակցիայի մասնակիցներից մեկը՝ դիմելով ՀՀ վարչապետին։
