Ուկրաինայի ՊՆ-ն հայտնում է, որ ՌԴ-ն «Իսկանդեր-Մ» բալիստիկ հրթիռներով թիրախավորել է բնակելի թաղամասը․ զոհվել է 19 մարդ, այդ թվում՝ 9 երեխա
Ռուսական զինված ուժերը երեկ երեկոյան հրթիռակոծել են ուկրաինական Կրիվոյ Ռոգ արդյունաբերական քաղաքի բնակելի թաղամասը, ինչի հետևանքով զոհվել է 19 մարդ, այդ թվում՝ 9 երեխա։
Այս մասին հայտնում են ուկրաինական լրատվամիջոցները։
«Ահաբեկչությունների արդյունքում տուժել է 68 մարդ՝ երեք ամսական երեխայից մինչև տարեցներ։ Այժմ հիվանդանոցներում է գտնվում 40 մարդ (երկու երեխա՝ 5 և 8 տարեկան, ծայրահեղ ծանր վիճակում տեղափոխվել են Դնեպրի հիվանդանոց), հիվանդանոցներում վիրավորվածներից 17-ը ծանր վիճակում են, այդ թվում՝ 2 երեխա»,-հայտնել է Կրիվոյ Ռոգի աննվտանգության խորհրդի նախագ Ալեքսանդր Վիլկուլը։
Հրթիռակոծությունից տուժել են 34 բազմաբնակարան շենքեր, 6 ուսումնական հաստատություններ։
Դնեպրոպետրովսկի շրջանի նահանգապետ Սերգեյ Լիսակը հայտարարել է, այս հարձակումը դարձել է այս տարի խաղաղ բնակիչների վրա ամենամահաբեր հարձակումներից մեկը։
Կրիվոյ Ռոգը Ուկրաինայի նախագահ Վլադիմի Զելենսկու ծննդավայրն է։
«Յուրաքանչյուր հրթիռ, յուրաքանչյուր ԱԹՍ-ով հարձակում ապացուցում է, որ Ռուսաստանը ձգտում է միայն պատերազմի»,-Տելեգրամում գրել է Զելենսկին։
Ռուսական կողմը հայտարարել է, որ հարձակման թիրախը քաղաքում ռազմական պաշտոնյաների հանդիպումն էր, և հարվածն էլ բնութագրել որպես «բարձր ճշգրտության»:
Ուկրաինայի զինված ուժերի գլխավոր շտաբը Telegram-ում հերքել է ռուսական կողմի հայտարարությունը և պարզաբանել, որ ՌԴ –ն քաղաքի վրա հարձակվել է «Իսկանդեր-Մ» բալիստիկ հրթիռով՝ կասետային մարտագլխիկով, որը նախատեսված է ավելի մեծ տարածք և ավելի մեծ թվով մարդկանց խոցելու համար։
