«Պալատկեքը խփելու ենք Նիկոլի տան դեմը՝ եթե մեր հարցը չլուծվի»․ Քասախ և Պռոշյան համայնքների բնակիչները փակել էին Երևան-Աշտարակ ավտոճանապարհը
Այսօր վաղ առավոտից Պռոշյան և Քասախ համայնքների բնակիչները բողոքի ցույց էին անում, նրանք փակել էին Երևան-Աշտարակ ավտոճանապարհը՝ դժգոհելով տրանսպորտի 25 և 59 համարների գծերի կրճատման և նոր, ավելի թանկ երթուղու ներդրման դեմ:
Բնակիչներն ասում էին, որ իրենց նախապես չեն իրազեկել տրանսպորտի թանկացման վերաբերյալ, հայտարարությունը եղել է միայն բողոքի ցույցերը սկսվելուց հետո։
«Ժողովուրդը տեղյակ չի, մենք մեզնով ենք տեղեկացել՝ էն մի վարորդից ով պետք է գիծ մտնի, նույն ձև աշտարակցին էլ չգիտի, որ իր տրանսպորտն էլ է թանկացել, թող մենք լինենք պատճառ, որ ժողովուրդը տեղեկանա»,-ոստիկանության աշխատակցի հետ զրույցում ասել է ցույցի մասնակից կանանից մեկը:
Բողոքի ցույցի վայրում էին ոստիկաններ, մի պահ իրավիճակը լարվեց, ցույցն ավելի թեժանալուց հետո ոստիկաններին միացան նաև կարմիր բերետավորները:
Քաղաքացիների հետ հանդիպեց ոստիկանության գնդապետը, ով տեղեկացրեց, որ ՏԿԵ փոխնախարարը համաձայնել է երկուշաբթի օրը ընդունել բնակիչների 20 հոգանոց խմբին՝ իրենց կողմից նախապես գույքագված խնդիրները վերջիններիս հետ քննարկելու համար:
Այս առաջարկը սկզբում չբավարարեց քաղաքացիներին, նրանք վստահ էին, որ իրենց կրկին խաբելու են.«Նորից պիտի կանչեն ժողովրդին, «բոլոլա» անեն, ճանապարհեն, ինչպես 30 տարի են խաբել: Չկա այնպիսի ոլորտի պաշտոնյա, որ ժողովրդի մասին մտածի: Բոլորն էլ նույնն են՝ «Էս ծառն իմն է, էս սարն իմն է»։
Նրանք պահանջում են գոնե 25 համարի երթուղին գործի՝ մինչև խնդրի լուծումը․« «Այսքան ուսանող է օգտվում 25 համարից։ Թող չմտնեն ժողովրդի գրպանը»։
Կառավարության ներկայացուցիչները ընդառաջ գնացին ժողովրդի պահանջին՝ մինչև փոխնախարարի հետ հանդիպումն ու հարցի վերջնական լուծումը՝ համայնքներում 25 համարի տրանսպորտը կգործի նախկին ժամանակացույցով:
«Եթե երկուշաբթի օրը մենք դրական պատասխան չստացանք, հենց տռասին պալատկեքը խփում ենք ու մնում ենք ստեղ։ Պալատկեքը խփելու ենք Նիկոլի տան դեմը»,- հայտարարեցին ցույցի մասնակիցներից ոմանք։
Բողոքի ցույցի մասնակիցները մի քանի ժամ ճանապարհը փակ պահելուց հետո բացեցին այն, ցույցը ժամանակավոր դադարացվեց, այն կշարունակվի, թե՝ ոչ, պարզ կլինի երկուշաբթի օրը՝ փոխնախարարի հետ հանդիպումից հետո։
Հավելենք, որ նոր երթուղին սպասարկելու է «Մուլտիտրանսպորտ» ընկերությունը՝ մեկ ուղևորության համար 200 և 250 դրամ արժեքով:
Նիկոլ Մարգարյան
