«ԿԳԲ-ն նույնպես գրոհի է անցել»․Հայկ Մարությանը վստահեցնում է, որ փորձ է արվում խոչընդոտել Երևանում հանրային տրանսպորտի դեմ քաղաքացիների բոյկոտը

Երևանի նախկին քաղաքապետը վստահեցնում է՝ եթե Երևանում բոյկոտեք  ու չվճարեք հանրային տրանսպորտից օգտվելիս, չեն կարող 50000 դրամ կիրառել, իսկ եթե նման բան լինի՝ Մարությանի թիմն աջակցություն կտրամադրի քաղաքացիներին

Այսօր դատարանի բակում Երևանի նախկին քաղաքապետ Հայկ Մարությանը, ով տևական ժամանակ է ինչ իր թիմակիցների հետ պայքարում է Երևանում հանրային տրանսպորտի թանկացման դեմ, լրագրողների հետ ճեպազրույցում չբացառեց, որ տրասպորտի թանկացման հանրային դժգոհությունները կարող են վերաճել  քաղաքական և սոցիալական բունտի։

«Վստահ եմ, որ մենք հաջողություն կունենանք, որովհետև եթե մենք բոլորս միասին մի բան ենք պահանջում, և մեր պահանջը արդար է, դա չի կարող տեղի չունենալ, սա պետական թալան է»,-ասաց  Մարությունը։

Նախկին քաղաքապետի վստահեցմամբ՝ այսօր առավոտից պետությունը  ժողովրդի դեմ գրոհի է անցել։ Անդրադարձավ Փաշինյանի հրապարակած  տեսանյութին, որտեղ նա երթևեկում է մետրոյով, ցույց է տալիս, թե ինչպես է տոմս գնում, Մարությանն ասաց․«Տեսանյութը խոսում է այն մասին, որ նա հաշտ է այս որոշման հետ։ Մարդիկ պետք է իմանան, որ Նիկոլ Փաշինյանի համար նորմալ է, որ եթե մեկ տոմս ես գնում, 300 դրամ է դառնում գինը, տարեկանը՝ 90 հազար դրամ։ Ուզում է ասել՝ ամեն ինչ լավ է, պետությունը լավն է, ուղղակի դուք եք վատը, ժողովուրդ ջան»։

Հարցին՝ հնարավո՞ր է մարդիկ, որոնք միանան բոյկոտին, օգտվեն հանրային տրանսպորտից, բայց չվճարեն 100 դրամը, Մարությանը պատասխանեց․«Երկրորդ փուլը պետության գրոհի՝ ԿԳԲ-ն նույնպես գրոհի է անցել, և մի թերթի միջոցով ապատեղեկատվություն է տարածում, իբր թե  50000 դրամ տուգանք է հասնում առանց տոմսի երթևեկելու համար»։ Մարությանը վստահեցրեց՝  նման տուգանք ՀՀ Սահմանադրությամբ և օրենսգրքերում սահմանված չէ։

Մարությանի կարծիքով՝ նման «գրոհ»-ի նպատակն է ժողովրդին վախեցնել ու խոչընդոտել, որ մարդիկ բոյկոտ չանեն։

Մարությանը հայտնեց, որ իրենց իրավաբանները ևս մեկ անգամ ստուգել են,  վստահեցնում են՝ նման օրենք գոյություն չունի, որ մարդկանց 50000 դրամով տուգանեն։ Նախկին քաղաքապետը վստահեցրեց՝ եթե ինչ-որ մեկին փորձեն ուղեվարձը չվճարելու կամ հարյուր դրամ վճարելու համար տուգանեն, իրենք  իրավական աջակցությունն ու ծախսերը կհոգան։

Քաղաքացիներ կան, որոնք անվստահություն ունեն Մարությանի նկատմամբ՝ հաշվի առնելով  նրա նախկին կապը այս կառավարության հետ, այս դիտարկմանն էլ Մարությանը պատասխանեց՝ մոտ երկու ամիս է դրսում ենք, տասնյակ հազարաոր մարդկանց ենք հանդիպել․«Չենք նկատել անվստահություն։  Տրանսպորտի թանկացման դեմ այս պայքարը բացարձակ կապ չունի քաղաքականության հետ կամ կուսակցականության։ Մենք հիմա պայքարում ենք սոցիալական արդարության համար։

Հնարավո՞ր է 2026 թվականի խորհրդարանական ընտրություններին ՀԱԿ-ի հետ դաշինքով մասնակցեն, Մարությանը չպատասխանեց այս հարցին, ասաց՝ քննարկում էլ չի եղել․« 2026  թվականը դեռ շատ հեռու է, մենք չենք էլ այս պահին այդ մասին մտածում։Կարող է ինչ որ հանդիպումներ են լինում, մարդիկ կան, որոնք ուզում են ինձ հետ հանդիպել, ես չեմ մերժում»։

Նա հիշեցրեց՝ 2013-ի բողոքի ցույցերը՝ տրանսպորտի թանկացման դեմ, երբ տարբեր քաղաքական  գորիչներ, այդ թվում՝ Նիկոլ Փաշինյանը, միացել էին ցույցին, բայց գործընթացը չդարձավ քաղաքական։ Ուստի նա  դիմեց քաղաքական ուժերին․ «Հանկարծ չփորձեք քաղաքականացնել էս պրոցեսը, սա մաքուր, սոցիալական, ժողովրդական պայքար է իրենց առօրյայի, կենցաղի համար»։

Նիկոլ Մարգարյան