«Ականատես» դիտորդական դաշինքը Գյումրիում ընտրությունները կդիտարկի առանց «Ժուռնալիստների «Ասպարեզ» ակումբ» ՀԿ-ի
«Ականատես» դիտորդական առաքելությունը դիմել է Կենտրոնական ընտրական հանձնաժողով՝ Գյումրիի ավագանու 2025թ. մարտի 30-ի արտահերթ ընտրություններում հավատարմագրվելու նպատակով:
Տեղեկացնում ենք, որ այս անգամ «Ականատես» դիտորդական դաշինքին կմիանա նաև «ՄԻՏՔ» հասարակական կազմակերպությունը։
Միաժամանակ հայտարարում ենք, որ շահերի բախման իրավիճակից խուսափելու նպատակով «Ականատես» դիտորդական առաքելությունը մարտի 30-ին Գյումրիում կայանալիք ընտրությունները կդիտարկի առանց նախաձեռնության անդամ՝ «Ժուռնալիստների «Ասպարեզ» ակումբ» հասարակական կազմակերպության մասնակցության։ Պատճառը կազմակերպության խորհրդի նախագահի՝ Լևոն Բարսեղյանի՝ Գյումրիի ավագանու անդամության թեկնածու լինելն է։
Հիշեցնում ենք, որ «Ականատես»-ը գործում է անկախ՝ պահպանելով անկողմնակալության սկզբունքը և խուսափելով այնպիսի գործողություններից, որոնք կարող են մեկնաբանվել որպես աջակցություն, քարոզչություն կամ հակաքարոզչություն ընտրություններին մասնակցող որևէ կուսակցության (կամ կուսակցությունների դաշինքի) օգտին կամ դեմ։
Դիտորդական առաքելությունն իրականացում է Եվրոպական միության և ԱՄՆ-ի Գերմանական Մարշալ հիմնադրամի՝ Անդրատլանտյան հիմնադրամի (GMF TF) ֆինանսական աջակցությամբ։
«Ականատես» դիտորդական առաքելության մասին
«Ականատես» դիտորդական առաքելությունը հիմնադրվել է 2018 թ.՝ «Թրանսփարենսի Ինթերնեշնլ հակակոռուպցիոն կենտրոն», «Ժուռնալիստների «Ասպարեզ» ակումբ» ՀԿ-ների, «Ռեստարտ» և «Իրավունքի զարգացման և պաշտպանության» հիմնադրամների կողմից: Առաքելության նպատակն է նպաստել ազատ և արդար ընտրությունների անցկացմանը, ընտրական գործընթացների օրինավորությանը, դրանց նկատմամբ հանրային վերահսկողության հաստատմանը, ինչպես նաև բարձրացնել ընտրական գործընթացների հանդեպ հանրային վստահության մակարդակը։
Նորություններ
