«Եթե մի օր չաշխատեմ, միայն այդ դեպքում կհիվանդանամ»․ 82-ամյա Լիանա տատն աշխատում է օրնիբուն, կառավարում իր մեծ տնտեսությունը
Լոռու մարզի Տաշիր համայնքի Բլագոդարնոյե գյուղը սկզբնական շրջանում եղել է ռուսաբնակ։ Կոչվել է Կիրիլովկա, հետագայում անվանվել է Բլագոդարնոյե։ Խիստ բնակլիմայական պայմաններ ունեցող գյուղում այսօր միայն հայեր են ապրում։
Բլագոդարնոյեն հայտնի է իր ալպյան մարգագետիններով և ընտիր պանրատեսակներով, նաև աշխատասեր ու հյուրընկալ մարդկանցով։ Գյուղում և համայնքում մեծ հարգանք է վայելում 82-ամյա Լիանա Դավոյանը, ով եռանդուն, արարող, ստեղծող մարդու լավագույն օրինակ է։
Չնայած իր պատկառելի տարիքին, տիկին Լիանան աշխատում է վաղ առավոտից մինչև ուշ երեկո, մեծ տնտեսություն է կառավարում։ Միայնակ տարեց կինը խոշոր եղջերավոր անասուններ է խնամում, մշակում տնամերձ հողամասը, լուծում անասնակերի, ջեռուցման և մյուս հարցերը։ Երբեք այսօրվա գործը վաղվան չի թողնում։
«Գյուղում հարս գալու օրվանից միշտ այս գործն եմ արել ու դրանից հաճույք եմ ստացել, երանի չէ՝ երիտասարդ լինեի, որ ավելի շատ անասուն պահեի, ավելի շատ գործ անեի»,-ասում է տիկին Լիանան։
Առողջությունից չի դժգոհում, բացի գլխացավի դեղից, երբեք այլ դեղորայք չի օգտագործել։ Նշում է՝ եթե մի օր չաշխատի, միայն այդ դեպքում կհիվանդանա:
Մանրամասները REGIONS TV-ի տեսանյութում՝ առանց մեկնաբանության։
