Վարչապետի հայտարարությունները վատ եկեղեցականների մասին, վերաբերում է այն հոգևորականներին, որոնց իր շուրջն էր հավաքել․ Տեր Վրթանես

Մայր աթոռ Սուրբ Էջմիածնում այսօր ժողով էին հրավիրել։

Թե ի՞նչ հարցեր են քննարկելու, Անանիա Վարդապետը լրագրողներին հայտնել է՝ եկեղեցուն մտահոգող խնդիրները։

Երեկ եպիսկոպոսների ու արքեպիսկոպոսների ստորագրությամբ հայտարարություն էր տարածվել, որով վերջիններս Վեհափառ Հայրապետից պահանջում էին, որ Արշակ Սրբազանը լքի Մայր Աթոռը։ Մինչ այս, ինչպես գրել էր վարչապետ Փաշինյանին պատկանող «Հայկական ժամանակ»-ը հրապարակել էր հայտարարությունը, որտեղ ասվում է, որ «փորձագիտությամբ հաստատվել է Մայր Աթոռի դիվանապետ Արշակ Խաչատրյանին վերագրվող տեսանյութերի իսկությունը, որը ներկայացվել է Գարեգին Բ-ին: Վերջինս առոչինչ է համարում այս արդյունքները:․․․ Հաշվի առնելով սա՝ եպիսկոպոսները դիմել են մնացյալ եպիսկոպոսներին և հանրությանը՝ հայ եկեղեցին Կտրիճ Ներսիսյանից և Արշակ Խաչատրյանից մաքրելու գործընթացին միանալու համար»:

Երեկ Նիկոլ Փաշինյանը  սոցիալական ցանցում կարճ տեսանյութ է տարածել,  գրելով. «Կարևոր հանդիպում ունեցա Հայաստանյայց Առաքելական Սուրբ Եկեղեցու մի խումբ եպիսկոպոսների հետ»: Նրա հետ հանդիպած եպիսկոպոսներն են Տեր Աբրահամ արքեպիսկոպոս Մկրտչյանը, Տեր Առաքել արքեպիսկոպոս Քարամյանը, Տեր Վազգեն արքեպիսկոպոս Միրզախանյանը, Տեր Անուշավան եպիսկոպոս Ժամկոչյանը, Տեր Վրթանես եպիսկոպոս Աբրահամյանը, Տեր Նավասարդ արքեպիսկոպոս Կճոյանը։

Ենթադրվում է, որ հոգևորականների ժողովում կքննարկվեն վերը նշված հարցերը։

Այսօր Մայր Աթոռում էր նաև Տեր Վրթանես քահանա Բաղալյանը։ Նա լրագրողների հետ ճեպազրույցում հարցին, թե ինչի համար են այսօր ժողով անում ու ինչ հարցրե են քննարկելու, պատասխանեց․«Մեր որդիական սերն ու հարգանքն ենք արտահայտում Վեհափառ Հայրապետին, աջակցություն ենք ցուցաբերում մեր բարեպաշտ  հավատացյալ ժողովրդին և ուզում ենք, որ Վեհափառ Հայրապետը արդարացի կամ ողորմաց վճիռ կայացնի այն բոլոր անձանց նկատմամբ, որոնք տարբեր կոմպրոմատների, շանտաժի, ահաբեկման նաև սուտ խոստումների զոհ են դարձել։ Կխնդրենք, որ Վեհափառը հնարավորինս ներողամիտ լինի իրենց նկատմամբ։ Ես նույնիսկ չեմ համարում, որ հայտարարությունն իրենց ազատ կամարտահայտությունն է եղել։ Ես կարծում եմ, որ իրենք այդ հայտարարությունը արել են պարտադրանքի, ճնշման, ահաբեկման, կոմպրոմատների ազզդեցության տակ»։

Նա նշեց, որ վարչապետի մեղադրանքները հոգևորականների վերաբերյալ, դրանք բոլոր այն բաներն են, որոնք ունեն Փաշինյանի հետ հանդիպած հոգևորականները։

Հարցին՝  ինչո՞ւ եք մեղադրում այն արքեպիսկոպոսներին, որոնք գնացել են վարչապետի հետ հանդիպման,  Տեր Վրթանեսը պատասխանեց․«Եթե իրենք առանց Վեհափառ Հայրապետի գիտության վարչապետի հետ հանդիպման են գնացել, արդեն իսկ ապօրինություն է, իրենք դրա իրավունքը չունեին»։

Անդրադառնալով Փաշինյանի հայտարարությանը, թե շատ հոգևորականներ խախտում են կուսակրոնության ուխտը, Տեր Վրթանեսը պատասխանեց․«Վարչապետն իր հետ հանդիպած հոգևորականներին է մեղադրում։ Նախկինում էր իրենք նման խնդիրներ ունեցել են, նրանք, ովքեր վարչապետի շուրջը հավաքվել էին։ Այն բոլոր հայտարարությունները, որոնք վարչապետն անում էր եկեղեցու նկատմամբ ատելություն և թշնամանք  տարածելու համար, այն կոմպրոմատները վատ եկեղեցականների մասին, հենց իր շուրջն էր հավաքել նման հոգևորականներին։ Ինչ-որ առումով  վարչապետը այդ հանդիպումով՝ մաքրեց եկեղեցին այն մարդկանցից, որոնք իրենց կարգին համապատասխան չէին»։

Նա հավելեց․«Եթե ես լինեի Վեհափառ Հայրապետը, իրենք երեկ երեկոյան կարգալույծ կհռչակվեին և ես այս կիրակի  վեց նոր եպիսկոպոս կօծեի»։ Ապա վստահություն հայտնեց, որ Վեհափառ Հայրապետը ողորմած է, կների այդ եպիսկոպոսներին՝ եթե զղջան։

Հարցին՝ ինչո՞ւ հոգևորականները չէին բարձրաձայնում իր նշած խնդրի մասին, Տեր Վրթանեսը պատասխանեց․«Ես չեմ բարձրաձայնել այդ մասին, նախ ասեմ, որ վարչապետն է բարձրաձայնել։ Մենք ժամանակ առ ժամնանակ այդ խնդիրների մասին բարձրաձայնում ենք և շատ հոգևորականներ կարգալույծ են արվել ժամանակին, շատերն էլ զղջացել են, իրենց համար ապաշխարության շրջան է տրվել, փորձել են հետ գալ եկեղեցի ապաշխարությամբ, նաև վստահաբար Վեհափառին խոստացել են, որ նման բան այլևս չի կրկնվի»։

Հիշեցմանը՝ վարչապետը Արշակ եպիսկոպոս Խաչատրյանին էլ է մեղադրում կուսակրոնության ուխտը խախտելու մեջ, Տեր Վրթանեսն այսպես արձագանքեց․« Վարչապետը թացը չորի հետ խառնում է, համատարած միջավայր է փորձում ստեղծել՝ ատելության, թշնամանքի»։

Հարցին՝ ովքե՞ր են այն հոգևորականները, որոնց Վեհափառը ներել է, և այդ ինչ մեղքեր են գործել, Տեր Վրթանեսնն ասաց, որ այդ փաստերը նրանց դեմ օգտագործելուց հետո վարչապետը ոչ միայն նրանց կօգտագործի եկեղեցու դեմ, այլև կոմպրոմատները կդնի համացանցում, ու բարեպաշտ ժողովրդին կթվա, թե եկեղեցին ավելի վատն է։

Թե Վեհափառն ո՞ւմ է նախկինում ներել, Տեր Վրթանեսն ասաց՝ այն բոլոր հոգևորականները, որոնք վարչապետի կողքին են հայտնվել։
Նավասարդ Կճոյանի՞ն էլ է ներել Բենթլի մեքենայի համար, այս հարցին հոգորականը հստակ չպատասխանեց․«Վարչապետը Բենթլիից էր, չէ՞ խոսում, ապօրինի հարստացումից էր խոսում»։

Թե՝ որտեղի՞ց գիտի, որ Կճոյանը ապօրինի հարստացել է, եթե անձամբ չիտեսել, հոգևորականը պատասխանեց՝ համացանցում քննադատություններ են եղել․«Վեհափառ Հայրապետը եկեղեցականների մեծ պակաս ունի։ Անթերի հոգևորականներ չկան։ Եթե Հայոց կաթողիկսոը լիներ Պետրոս առաքյալը, վարչապետը նույն հաջողությամբ իրեն պիտի ասեր՝ մատնության գիշերը Տիրոջը երեք անգամ ուրացար։ Եթե նույնիսկ Գրիգոր Լուսավորիչը լիներ, պիտի ասեր՝ քո հայր Անակը մեր հայոց խոսրով թագավորին է սպանել ու էլի հակաեկեղեցական պայքար տաներ»։

Հարցին՝ Արշակ Սրբազանին տրվե՞լ է ապաշխարության հնարավորություն և արդյոք այդ հրապարակված տեսանյութը համապատասխանում է իրականությանը, քանի որ հոգևորականները հայտարարություն էին տարածել, որի համաձայն՝ տեսնյութը համապատասխանում է իրականությանը, Տեր Վրթանեսը պատասխանեց․«Նախ ասեմ, որ այդ տեղեկությունը ճիշտ չի եղել, կեղծված է, արհեստակական բանականության միջոցով ստեղծված է։ Բացի այդ, դա արել են գաղտնալսումից հետո։ Նման ապատեղեկատվությունները նպատակ ունեն թշնամություն տարածելու»։

Հնարավո՞ր է, որ էլի բարձրաստիճան հոգևորականներ միանան Փաշինյանին, բացի երեկ հանդիպած 8 հոգևորականներից,  նա պատասխանեց․«Վարչապետը այս ութ տարվա մեջ իր շուրջ ութ հոգևերական է հավաքել։ Վեհափառի կողքին մնացել են եպիսկոպոսների և արքեպիսկոպոսների մեծ մասը։ Ավելին ասեմ՝ եթե նրանց մեծ մասը միանային վարչապետին, դա որևէ հիմք չէ Վեհափառ Հայրապետի հրաժարական տալու համար։ Վեհափառ Հայրապետը կարող է հրաժարական տա միայն այն ժամանակ, եթե դավանաբանական շեղում ունենա հավատքից»։

Տիրուն Մարգարյան