«Այս իշխանության ջանքերը միտված են նրան, որ ցաքուցրիվ անեն արցախցիներին ու վերջնական փակեն այդ էջը»
Նիկոլ Փաշինյանի ու իր կառավարության ջանքերը միտված են նրան, որ ցաքուցրիվ անեն արցախցիներին ու վերջնական փակեն այդ էջը,-REGIONS TV-ի հետ զրույցում հայտարարեց Արցախի խորհրդարանի «Արդարություն» խմբակցության պատգամավոր Դավիթ Գալստյանը՝ անդրադառնալով արցախցիներին տրամադրվող սոցիալական ծրագրերի կրճատմանը:
«Այնպիսի իրավիճակ են ստեղծել, որ ամեն օր ահազանգ ենք ստանում՝ մարդիկ արտագաղթում են՝ չկարողանալով լուծել սոցիալական խնդիրները»,-ընդգծեց ԱՀ ԱԺ պատգամավորը:
Ըստ Գալստյանի՝ Հայաստանի իշխանությունը միջազգային հանրության տարբեր ներկայացուցիչների ազդակներ է հղում, որ չխոսեն արցախահայության վերադարձի հնարավորության մասին:
«Միջազգային հարթակներում խոսում ենք արցախցիների վերադարձի իրավունքի մասին, ընդամենը փորձում ենք հարցն օրակարգում պահել: Հայաստանի կառավարությունը ոչ միայն չի խոսում այդ մասին, այլ նաև արհեստական խոչընդոտներ է ստեղծում այն կառույցների համար, որոնք միջազգային հարթակներում խոսում են վերադարձի հնարավորության ու իրավունքի մասին, ասում են՝ իբրև դա վնասում է Բաքվի հետ խաղաղության գործընթացին, բայց մենք տեսնում ենք, որ, անկախ ամեն ինչից, Ադրբեջանը խաղաղության պատրաստ չէ, իսկ այդ երկրի ամեն օր ավելացող պահանջները վկայում են, որ այս իշխանությունը նվեր է թուրք-ադրբեջանական տանդեմի համար և իրենք նպատակ ունեն վերջնականապես կործանել Հայաստանը»,-նշեց Գալստյանը:
