Բողոքի ակցիա իրականացնող վարորդները պահանջում են հստակ լուծումներ
Առավոտից Երևան քաղաքում ավտոբուսների վարորդները բողոքի ակցիա են իրականացնում: Վերջիններս հրաժարվում են երթուղի դուրս գալ և որոշել են չաշխատել այնքան ժամանակ, մինչև իրենց բողոքը քաղաքապետարանի կողմից չբավարարվի: Վարորդների խոսքով՝ խնդիրները բազմաթիվ են՝ աշխատավարձերից մինչև հանրային զուգարանների բացակայություն, շատ հաճախ նորմալ չեն աշխատում նաև վալիդատոր սարքերը, ինչը ուղևորների հետ լրացուցիչ խնդիրների պատճառ է դառնում:
Վարորդների խոսքով՝ քաղաքապետարանի պաշտոնյաներն անտարբեր են խնդրի նկատմամբ:
Վերջիններս գործադուլավորների այս պահվածքը շանտաժի դրսևորում են համարում, ինչին ի պատասխան վարորդներն արձագանքում են, որ խնդիրը նոր չէ, քաղաքապետարանից դեռ 1 ամիս առաջ են խոստացել լուծել հարցը, սակայն ոչ մի քայլ չի արվել:
«Մեկդ հարց տվեք, ո՞վ է տվել ձեզ այդ համազգեստը. քաղաքապետարանը 12500 դրամով մեզ վաճառել է համազգեստը, 5000-ով էլ ժիլետը»,-վրդովված հայտարարեց վարորդներից մեկը: Նրա խոսքը հաստատեցին նաև մյուս վարորդները:
Նրանք հայտարարեցին, որ կորցրել են վստահությունը ներկայիս տնօրենի նկատմամբ: «Մեզ անընդհատ խաբում են, ռուսի «послезавтра»-ն ա, մեզ հետ պետք է ռեալ աշխատող մարդ լինի»,-բողոքում են վարորդները: Նրանք հայտարարեցին, որ դուրս կգան աշխատանքի միայն այն ժամանակ, երբ իրենց ներկայացվի հստակ պայմանագիր՝ կոնկրետ աշխատավարձի չափով, ինչը պետք է բավարարի վարորդներին, հակառակ դեպքում սպառնում են դիմում գրել և հեռանալ, քանի որ այլևս զիջելու տեղ չունեն:
Նիկոլ Մարգարյան
