Անսահման զիջումների գիծը մեզ կործանման է տանելու. դիվանագետ
«Երբ լսում ենք Ադրբեջանից հնչող հայտարարությունները, հասկանում ենք՝ այդ երկրում խաղաղության հասնելու տրամադրվածություն չկա,- REGIONS TV-ի հետ զրույցում ասում է արտակարգ և լիզոր դեսպան Ձյունիկ Աղաջանյանը՝ անդրադառնալով խաղաղության պայմանագիր կնքելու մասին Երևանից հնչող հայտարարություներին ու Փաշինյանի ջանքերին.
«Այս իշխանության կողմից այդ փաստաթուղթը «խաղաղության» կոչելը հանրությանը խաբելու նպատակով է, որովհետև ականջահաճո այդ բառը տպավորություն է ստեղծում, թե ի վերջո լինելու է կայունություն և վերջ է դրվելու թշնամանքին»,-ասում է դիվանագետը:
Աղաջանյանը համոզված է՝ եթե նույնիսկ ստորագրվի այդ փաստաթուղթը, Հայաստանի համար դրական որևէ ակնկալիք չի արդարանալու.
«Այդ փաստաթուղթ կոչվածը ՀՀ-ի համար լինելու է վերջնական կապիտուլյացիա, դրանից արտահոսած տարրերը խոսում են այն մասին, որ Հայաստանը պաշտպանական որևէ համակարգ չի ունենալու, ՀՀ-ն՝ անզեն ու մերկ, դրվելու է թուրք-ադրբեջանական զոհասեղանին»:
Ի հակադրություն Փաշինյանի պնդումների, թե ինքն ու թիմը պայքարում են պետությունը պահելու համար, Աղաջանյանը համոզված է՝ եթե օրվա իշխանությունը շարունակի գործել նույն կերպ, Հայաստանը՝ որպես պետություն, որպես հայերի հայրենիք, ոչնչացման է դատապարտված.
«Այն անսահման զիջումների գիծը, որ իրենք բռնել են, մեզ ուղղակի կործանման է տանելու: Հայաստանը մեծ հնարավորություններ ունի, բայց դրանք իրացնելու համար երկրի ղեկին պետք է լինի ազգային շահերով տոգորված և դրանցով առաջնոդվող ղեկավարություն»,-համոզված է դիվանագետը:
