Փաշինյանը եկավ, կործանեց ու ջնջեց այդ հնարավորությունները․ իրավապաշտպան
«Աշխարհը մեզ ոչ թե նահատակ, այլ որպես պետություն է ընկալում, որը կայացման գործընթացում է և ոչ մի կերպ չի կարողանում ավարտին հասցնել այդ գործընթացը»,-REGIONS TV-ի հետ զրույցում հայտարարեց իրավապաշտպան Վարդան Հարությունյանը՝ անդրադառնալով ԱԺ ամբիոնից Նիկոլ Փաշինյանի հնչեցրած մտքին, թե աշխարհը մեզ ընկալում է որպես ազգ-նահատակ:
«Մենք չենք ունեցել և չունենք պետության գինը հասկացող, մեր պատմությունը գնահատող իշխանություն: 90-ականների առաջին տարիներին, երբ մենք ծանրագույն պատերազմի մեջ էինք, աշխարհը մեզ ընկալում էր որպես պետություն: Մեր նախագահին դիմավորում էին որպես փոքր, բայց լուրջ, կայացման ճանապարհը բռնած պետության ղեկավարի: Հետո եկան մարդիկ, որ պետության արժեքը չհասկացան, և հիմա էլ չեն հասկանում»,-նշեց Հարությունյանը:
Վերջին շրջանում Փաշինյանի բառապաշարը նման է պարտված, ողնաշարը կոտրված, թույլ ու խոցելի մարդու խոսույթի։ Նրա բոլոր ելույթներն ուղղված են մեր հարևաններին, որոնց թելադրանքների տակ կքած՝ նա փորձում է խուսանավել․ սա է Փաշինյանը: Նա չունի հնարավորություններ և կարողություններ այդ թելադրանքներին դիմակայելու, բայց նաև բավականին մեծամիտ է, որպեսզի կարող ուժեր ներգրավի և փորձի նրանց օգնությամբ ինչ-որ բանի հասնել»,-ավելացրեց իրավապաշտպանը։
Ինչ վերաբերում է Փաշինյանի հայտնի պնդմանը՝ «Արցախը Հայաստան է և վե՛րջ», որը հիմա լրացնում է հետևյալ հարցով ու հարակից մեկնաբանությամբ․ «Մենք ասել ենք՝ չէ, Ղարաբաղը անկախ պետություն չէ։ Լավ, Ղարաբաղը Ադրբեջա՞ն է, չէ, Ղարաբաղը Ադրբեջան չի։ Ղարաբաղը Հայաստա՞ն է, չէ։ Բա Ղարաբաղն ի՞նչ է», ապա, Հարությունյանի խոսքով, իր համար լուրջ չէ վարչապետի բարձրացրած այս հարցը։
«Արցախն ի սկզբանե ինքնորոշված տարածք էր, որը հետո Ռոբերտ Քոչարյանի ու Սերժ Սարգսյանի թեթև ձեռքով դարձավ վիճելի: Այնուհետև այդ վեճը պետք է ինչ-որ հանգուցալուծում ունենար, հույս կար, ճանապարհներ կային, որ այդ հանգուցալուծումը կարող էր լինել մեծ տոկոսով հօգուտ Արցախի, բայց Նիկոլ Փաշինյանը եկավ, կործանեց ու ջնջեց այդ հնարավորությունները: Դու ես կործանել Արցախը, ու՞մ ես հարցնում»,-հայտարարեց Հարությունյանը:
