«Գյումրու սգո էջը հետայսու փակված է»․վերաօծվեց Սուրբ Ամենափրկիչ եկեղեցին
Սուրբ Ամենափրկիչ եկեղեցին ավերվել էր 1988-ի ողբերգական երկրաշարժի հետևանքով, տասնամյակներ տևած վերականգնման աշխատանքներն այսօր ի ցույց դրվեցին վերաօծմամբ, պահպանվել են ճարտարապետական առանձնահատկությունները, ներսում ավելացել են ժամանակակից տարրեր, որոնք արտացոլում են համայնքի տոկունությունն ու հավատքը
Գյումրու Սուրբ Ամենափրկիչ եկեղեցին այսօր վերաօծվեց։ Օրը խորհրդանշական է՝ դեկտեմբերի 7-ը Սպիտակի երկրաշարժի տարելիցն է, եկեղեցու վերաօծմամբ այս օրը դառնում է հույսի և վերածննդի խորհրդանիշ։ Սուրբ Ամենափրկիչ եկեղեցին ավերվել էր ճակատագրական երկրաշարժի հետևանքով, վերականգնման աշխատանքները սկսվել են 2002 թվականին։ Վերանորոգումը տևել է տարիներ՝ ներառելով և՛ եկեղեցու կառուցվածքի ամրապնդումը, և՛ ճարտարապետական առանձնահատկությունների վերականգնումը՝ հնարավորինս պահպանելով նրա պատմական տեսքը։
Տասնամյակների վերականգնման աշխատանքներն ի ցույց դրվեցին դեկտեմբերի 7-ին՝ վերաօծման հանդիսավոր արարողությամբ, որը նշանավորում է Սուրբ Ամենափրկիչի վերադարձը որպես Գյումրու հոգևոր և մշակութային կենտրոն։
Հանդիսավոր արարողությանը ներկա էին հոգևոր առաջնորդներ, տեղական իշխանության ներկայացուցիչներ և բազմաթիվ հավատացյալներ։ Եկեղեցին վերականգնվել է՝ պահպանելով իր ճարտարապետական առանձնահատկությունները, իսկ ներսում ավելացել են ժամանակակից տարրեր, որոնք արտացոլում են համայնքի տոկունությունն ու հավատքը։
Պատարագի ժամանակ Ամենայն Հայոց Կաթողիկոս Գարեգին Երկրորդը հայտարարեց. «Գյումրու սգո էջը հետայսու փակված է»։
Սյուզան Խառատյան
Լուսանկարները՝ Սյուզան Խառատյանի
