Արցախից բռնի տեղահանված 25․000 ընտանիքներից միայն 2-ն է պետական ծրագրով ՀՀ-ում անշարժ գույք ձեռք բերել
Արցախցիների բռնի տեղահանությունից ավելի քան մեկ տարի է անցել, բայց Հայաստան տեղափոխված ընտանիքների մեծ մասը դեռ չի ինտեգրվել, չի հարմարվել կյանքի նոր պայմաններին։ Բնակապահովման, զբաղվածության և պետական աջակցության մի շարք ծրագրեր են մշակվել, ու թեև դրանք գործում են, բայց օգտվողները շատ քիչ են։
2023 թ․-ին Արցախից տեղահանվել է 100․625 մարդ՝ մոտ 25․000 ընտանիք։ Աշխատանքի և սոցիալական հարցերի նախարարության տվյալներով՝ 2024 թ․-ի նոյեմբեր ամսվա դրությամբ բռնի տեղահանված ընտանիքների միայն 7,5 տոկոսն է դիմել պետական բնակապահովման ծրագրից օգտվելու համար, ստացվել է ընդամենը 1501 դիմում։
Պահանջներն այնքան շատ են, որ արցախցի ընտանիքների գերակշիռ մասը հրաժարվում է օգտվել այդ ծրագրից։ Շահառու դառնալու հիմնական պահանջը ՀՀ քաղաքացիություն ունենալն է։ Հենց սա էլ, ինչպես շատերին, այնպես էլ Գասպարյաններին ու Գյումրիում ապրող մյուս տեղահանված արցախցիներին հետ է պահում ծրագրից օգտվելու մտքից։
