Արագածոտնի մարզում վթարի է ենթարկվել Ապարան-Երևան երթուղու մարդատար «Gazel»-ը. կա 13 վիրավոր
Այսօր՝ հունվարի 6-ին, խոշոր ավտովթար է տեղի ունեցել Արագածոտնի մարզում: Ժամը 13:50-ի սահմաններում Երևան-Վանաձոր ավտոճանապարհին՝ Տառերի պուրակի հարևանությամբ, Ապարան-Երևան երթուղին սպասարկող մարդատար «Gazel»-ը դուրս է եկել երթևեկելի գոտուց և հայտնվել ձորակում: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 13 հոգի տարբեր աստիճանի մարմնական վնասվածքներով տեղափոխվել է, ըստ դեպքի վայրում հավաքվածների, մի մասը՝ «Աշտարակ», մյուս մասը՝ «Ապարան» բժշկական կենտրոններ:
Վիրավորներին առաջինը օգնության են հասել քաղաքացիները և օպերատիվորեն ժամանած ՀՀ ներքին գործերի նախարարության փրկարար ծառայության Աշտարակի հրշեջ-փրկարարական ջոկատի փրկարարները:
Վթարի փաստով քննչական վարչությունում նախաձեռնվել է քրեական վարույթ: Ֆոտոլրագրողը հայտնում է, որ ՊԾ Արագածոտնի գումարտակի պարեկները պարզել են, որ մինչև ձորակոմ հայտնվելը, բախում է տեղի ունեցել «Gazel»-ի, «Opel»-ի ու «ՎԱԶ 2106» մակնիշի ավտոմեքենաների միջև: Ոստիկանությունն ու քննչական վարչությունը պարզում են վարորդների և վիրավորների ինքնությունը:
