Փարաքարում փրայմերիզ է՝ ՔՊ-ն նախնական ընտրություններ է անցկացնում
Փարաքար խոշորացված համայնքի նախնական ընտրություններին մասնակցում է նաև համայնքի նախկին ղեկավարը, որի անունը շրջանառվել էր մամուլում՝ աղմկոտ միջադեպի հետ կապված
Փարաքար խոշորացված համայնքում այսօրվանից նախնական ընտրություններ են՝ փրայմերիզը։ Այն տևելու է մինչև հունվարի 13-ը։
Հունվարի 3-ին Նիկոլ Փաշինյանը հայտնել էր Փարաքար խոշորացված համայնքի նախնական ընտրությունների մասնակիցների անունները, որոնք ընտրվել են ՔՊ Վարչության նիստում կայացված որոշմամբ։
Փարաքար խոշորացված համայնքի նախնական ընտրություններին մասնակցում են՝ Արփինե Առաքելյանը, Լյուդվիգ Գյուլնազարյանը, Կարեն Երեմյանը, Մհեր Հարությունյանը, Արման Մնացականյանը, Գոռ Սարիբեկյանը:
Ամենաշատ ձայներ ստացած թեկնածուն կնշանակվի Փարաքար խոշորացված համայնքի ղեկավարի պաշտոնակատար։
Գյումրիից հետո Փարաքարը երկրորդ համայնքն է, որտեղ փրայմերիզ է անցկացնում իշխող ուժն ու իր շարքերից էլ ղեկավար նշանակում։
Հիշեցնենք, «Քաղաքացիական պայմանագիր» կուսակցության թեկնածու Լյուդվիգ Գյուլնազարյանը Փարաքար խոշորացված համայնքի ղեկավար էր ընտրվել այս տարվա մայիսի 31-ին: Նա, սակայն, հրաժարական տվեց դեկտեմբերի 18-ին՝ Երևանում տեղի ունեցած սպանությունից հետո, ըստ մամուլի հրապարակումների, Գյուլնազարյանն էլ է դեպքի վայրում եղել, հրազենային վնասվածք է ստացել։ Գյուլնազարյանը լրատվամիջոցներին հայտնել է՝ « Իմ կամքից անկախ հայտնվել եմ մի տեղ ոչ ճիշտ ժամին, ոչ ճիշտ վայրում։ Ես ոչնչի հետ կապ չունեմ»:
