Ի վերջո հասնելու է մի կետ, երբ Ալիևի պահանջները կատարելը լինելու է անհնար. քաղաքագետ
«Տարեսկզբին Ալիևի արած հայտարարությունները ցույց տվեցին, որ սա խաղաղության տանող ճանապարհ չէ: Սա ճանապարհ է, որը ուշ թե շուտ հանգեցնելու է ագրեսիայի»։ Այս մասին REGIONS TV-ի հետ զրույցում հայտարարեց քաղաքագետ Աննա Կարապետյանը՝ ընդգծելով, որ Ալիևի պահանջներին ամեն գնով համաձայնելու Երևանի փորձերը հանգեցնում են նոր պահանջների և նաև Հայաստանի դիրքերի թուլացման։
«Ալիևը շատ լավ հասկացել է՝ իր ձեռագիրն աշխատում է, այսինքն՝ կարելի է առաջ քաշել պահանջ, սպառնալ, որ ուժ կկիրառի, և Հայաստանի իշխանությունը շտապելու է այդ պահանջը կատարել: Ի վերջո հասնելու է մի կետ, երբ այդ պահանջները կատարելը լինելու է անհնար և Ալիևը գնալու է ագրեսիայի: Հարցն այն է՝ ինչ վիճակում է լինելու այդ փուլում Հայաստանը և ինչպես է կարողանալու դիմադրել»:
Հայաստանը դեմ չէ Բաքվի հերթական պահանջին՝ լուծարել ԵԱՀԿ Մինսկի խումբը, քաղաքագետի խոսքով՝ այսպիսով՝ Երևանը հերթական անգամ վերահաստատում է, որ իր համար Արցախի հարց գոյություն չունի։
«Սա շատ վտանգավոր է քաղաքական տեսանկյունից, որովհետև գոնե պահպանվում էր հույսը, որ վաղն այս իշխանության չլինելու դեպքում հնարավոր կլիներ բարձրացնել Արցախի հարցը: Միջազգային հանրությունն էլ շատ լավ հասկանում է, որ սա հակամարտության կարգավորում չէ: Պատահական չէ, որ միջազգային տարբեր ատյաններ ընդունում են բանաձևեր, որտեղ ասվում է, որ հակամարտություն կա, և մինչև այս մարդկանց անհատական ու կոլեկտիվ իրավունքները չվերականգնվեն, հակամարտությունը լուծված չի լինելու: Ստացվում է՝ Հայաստանի իշխանությունը միանում է Ադրբեջանին ու հայտարարում՝ հակամարտություն չկա, այդպիսով՝ վաղը այդ հարցը բարձրացնելը շատ դժվար է լինելու»,-նշեց քաղաքագետը:
