Քիչ առաջ ստորագրվեց ՀՀ-ԱՄՆ միջև ռազմավարական գործընկերության մասին փաստաթուղթը
Էնթոնի Բլինքենը հայտարարեց, որ ստեղծվում է ռազմավարական գործընկերության հանձնաժողով ՀՀ-ԱՄՆ փոխգործկցության շրջանակն ընդլայնելու համար
Քիչ առաջ Վաշինգտոնում ստորագրվեց Հայաստանի Հանրապետության և Ամերիկայի Միացյալ Նահանգների միջև ռազմավարական գործընկերության մասին փաստաթուղթը։
Այն ստորագրեցին ՀՀ ԱԳ նախարար Արարատ Միրզոյանը և ԱՄՆ պետքարտուղար Էնթոնի Բլինքենը
Էնթոնի Բլինքենն իր խոսքում ասաց․«Արձանագրում ենք անկյունաքարային ձեռքբերում ՀՀ-ԱՄՆ հարաբերություններում։ Ստեղծում ենք ռազմավարական գործընկերության հանձնաժողով, որը մեզ հաղորդում է մի ամբողջ շրջանակ մեր փոխգործակցությունը մի շարք կարևոր ուղղություններով ընդլայնելու համար՝ տնետսական անվտանգության, պաշտանության, ժողովրդավարության, արդարադատության, ներառականության և միջանձնյա հարաբերություններին։ Սրանցից յուրքանչյուրը համընդհանուր շահերի ներքո հանդիսանալու է մեր հարաբերությունների առանցքը»։
Բլինքենը նաև նշեց, որ ԱՄՆ–ն Հայաստանի հետ աշխատում է նաև անվտանգության և պաշտպանության ոլորտում՝ մասնավորապես` Հայաստանի անկախությունն ու ինքնիշխանությունը սեփական տարածքում պաշտպանելու ջանքերին աջակցելու համար։ ԱՄՆ պետքարտուղարը հայտնեց, որ հաջորդ ամիս, առաջիկա շաբաթներին, Հայաստան կմեկնի մաքսային և սահմանային անվտանգության հարցերով ամերիկյան թիմը՝ աշխատելու հայ գործընկերների հետ սահմանային անվտանգության կարողությունների զարգացման, անվտանգության ոլորտում համագործակցության ամրապնդման և Հայաստանի խաղաղապահ կարողությունների բարձրացման ուղղությամբ` «Արծիվ գործընկեր»-ի նման զորավարժությունների միջոցով։ Ստորագրմանը հաջորդած հանդիպմանը Միրզոյանը և Բլինքենը քննարկել են Հայաստանի և Միացյալ Նահանգների միջև համագործակցության հետագա խորացմանը միտված օրակարգային հարցերն, ընթացիկ աշխատանքներն ու հետագա հնարավոր քայլերը։
