Ինչո՞ւ է Ալիևը միջանցքի հարցը նորից օրակարգ բերում
«Ալիևին խաղաղության պայմանագիր պետք չէ, որովհետև ինչ ուզում, ստանում է»: REGIONS TV-ի հետ զրույցում նման կարծիք հայտնեց միջազգայնագետ Գրիգոր Բալասանյանը՝ պնդելով՝ հորիզոնում խաղաղության որևէ փաստաթղթի հեռանկար չի նշմարվում։
«Ինչո՞ւ պետք է Ալիևը պայմանագիր ստորագրի, դրանով ձեռքերը կապի: Երևանը ոչ մի նախապայման, ոչ մի կարմիր գիծ չի ֆիքսում, հետևաբար, Ալիևի համար սա շատ կոմֆորտ վիճակ է»,-նշեց Բալասանյանը:
Ինչ վերաբերում է Հայաստանից միջանցք ստանալու վերաբերյալ Բաքվի պահանջին, Բալասանյանն ընդգծեց՝ սա ծուղակ է Բաքվի համար, Երևանը կարող է օգտվել․ հիշեցնում է՝ նախապես հայտարարվել էր, որ այս թեման խաղաղության բանակցություններից դուրս է թողնվելու, հիմա հարց է առաջանում՝ ինչո՞ւ է Ալիևը նորից հարցն օրակարգ բերում։
«Արդյոք սա կապված չէ Սիրիայի դեպքերի հետ, արդյոք սա կապված չէ Էրդողանի այն հայտարարության հետ, որ առաջիկա ամիսներին տարածաշրջանում լուրջ փոփոխություններ են լինելու: Ալիևը, ըստ էության, պատվեր է կատարում: Իրանի շուրջ լուրջ իրադարձություններ կարող են ծավալվել, և Ադրբեջանն այստեղ շատ ուղղակի դեր է ունենալու: Հայաստանը պետք է ամեն օր աշխատի Իրան-Ադրբեջան հարաբերությունները վատացնելու ուղղությամբ»,-հայտարարեց Բալասանյանը:
