«Ջալալ Հարությունյանը չի պնդել, որ մերոնք են»․ դատական նիստին փաստաբանները՝ զինվորների շրջափակման մասին
Արցախի պաշտպանական բանակի նախկին հրամանատար Ջալալ Հարությունյանի գործով դատական նիստը կայացավ Սյունիքի մարզի առաջին ատյանի ընդհանուր իրավասության դատարանի Գորիսի նստավայրում։
Եզրափակիչ ելույթների նիստում ներկայացվեց Հարությունյանի պաշտպանական ճառը, որտեղ փաստաբանները ներկայացրեցին Ջալալ Հարությունյանին առաջադրված մեղադրանքին առնչվող փաստեր, որոնք Վարանդայում (Ֆիզուլի) զինվորների շրջափակմանն էին վերաբերում։
Ըստ Քննչական կոմիտեի՝ հոկտեմբերի 12-ին Ֆիզուլիի մոտակայքում նկատվել է 100-ից ավելի զինծառայողներից բաղկացած խմբի տեղաշարժ կրակային դիրքի ուղղությամբ, նրանց շարքերում երևացել են նաև Հայաստանի ԶՈՒ համազգեստ կրող անձինք: Կասկածելով, որ մոտեցողները հակառակորդի դիվերսիոն խումբ են, ռադիոկապով զեկուցել են այդ մասին։ Սակայն Ջալալ Հարությունյանը, ըստ մեղադրանքի, առանց համակողմանի ուսումնասիրության, նշել է, որ այդ խմբավորումը յուրային է, ինչը փոխանցվել է դիվիզիոնի անձնակազմին: Այս ամենի հետևանքով զինվորները հայտնվել են հակառակորդի թիրախում՝ 20 զինծառայող է զոհվել, 7-ը՝ վիրավորվել, զորամասն անցել է Ադրբեջանի հսկողության տակ։
Դատական նիստին փաստաբանը ընդգծեց, որ Ջալալ Հարությունյանը չի պնդել, որ մերոնք են, այլ կարծիք է հայտնել, որ ըստ հագուստի և պարագաների, մերոնք են։ Այդ մասին հարցաքննությունների ժամանակ նշել են նաև վկաները։
Փաստաբանը նաև նշեց, որ արհեստականորեն Հարությունյանի վրա մեղքը բարդելը պայմանավորված է որոշ հրամանատարների մեղքը թաքցնելու փաստով։ Դատական նիստի ընթացքում գաղտնի փաստաթղթերի ներկայացման պատճառով դատարանը որոշեց անցնել դռնփակ նիստի։
