Ագրեսիայի համար պետք են նախադրյալներ, իսկ մենք դրանք չգիտենք և չենք տեսնում․ Սուրեն Պապիկյան

Հայաստանի Պաշտպանության նախարար Սուրեն Պապիկյանը հունվարի 15-ի ասուլիսում մեկնաբանել է ինչպես երկրի պաշտպանական քաղաքականությունը, այնպես էլ հայ-ռուսական հարաբերությունների զարգացումը։ Նախարարը  խոսեց երկրի սահմանների անվտանգությունը պաշտպանելու անհրաժեշտությունից՝ նշելով, որ դա պետք է իրականացվի հավասարակշռված քաղաքականությամբ, քանի որ այդ խնդիրը չի կարող միայն զինված ուժերի կամ մեկ այլ գործընկերոջ վրա դրվել։ «Մենք համատեղ ջանքերով, նաև երկխոսությամբ պիտի լուծենք մեր երկրի առջև ծառացած խնդիրները»,- ասաց նա՝ ընդգծելով, որ Հայաստանը պետք է կարողանա իր խնդիրները լուծել, բայց չի զրկվում արտաքին աջակցության հնարավորությունից։

Նախարարը  շեշտեց, որ տարածաշրջանում գոյություն չունեն այս պահին Հայաստանի դեմ ագրեսիայի համար նախադրյալներ, ուստի Հայաստանն ամեն կերպ պատրաստ է աջակցություն ստանալու առաջարկներ ներկայացնել խաղաղության գործում։ «Հռետորաբանությունը՝ հռետորաբանություն, բայց ցանկացած ագրեսիայի համար պետք են հիմքեր»,- հավելեց Պապիկյանը՝ նշելով, որ այժմ աշխարհում կա տագնապային իրավիճակ, սակայն խնդիրները հնարավոր է լուծել նաև բանակցությունների միջոցով։

Նրա խոսքով, վերջին շրջանում ադրբեջանական տեսանյութերը, որոնք պնդում էին, որ սահմանին զորաշարժ է նկատվում, չեն համապատասխանում իրականությանը։ «Որևէ զորաշարժ մեզ համար տեսանելի չէ»,- ասաց Պապիկյանը՝ ընդգծելով, որ որպես պաշտպանության նախարար, նա պետք է ունենա հիմնավոր հիմքեր նման հայտարարություններ անելու համար։

Այնուհետև Պապիկյանը անդրադարձավ հայ-ռուսական ռազմավարական դաշնակցությանը, որն, ըստ նրա, շարունակվում է։ «Հայ-ռուսական հարաբերությունները շարունակվում են․ ո՛չ Հայաստանը կտեղաշարժվի իր տեղից, ո՛չ Ռուսաստանը»,- ասաց նախարարը՝ ընդգծելով, որ երկու երկրների միջև շարունակում են գործել գործող պայմանագրերը։ «Մենք պետք է ունենանք սպասարկման պայմանագրեր, դրանք հարցեր են, որոնցից ո՛չ ռուսական կողմը, ո՛չ մենք չենք խուսափում և չպիտի խուսափենք»,- նշեց նա։

Պապիկյանը նաև տեղեկացրեց, որ Հայաստանի և Ռուսաստանի ֆինանսների նախարարությունների միջև ձեռք է բերվել պայմանավորվածություն, համաձայն որի՝ Հայաստանի կողմից զենքերի համար կատարած վճարումները կպակասեցվեն երկկողմ պարտքից։

Պաշտպանության նախարար Սուրեն Պապիկյանը, խոսելով ՀԱՊԿ-ի հետ Հայաստանի հարաբերությունների մասին, նշել է, որ համաշխարհային իրավիճակը պահանջում է առավել ռացիոնալ մոտեցում ու պատրաստություն արտաքին սպառնալիքներին։ Նրա խոսքով՝ թեև Ռուսաստանի և ՀԱՊԿ-ի հետ հարաբերությունները սրվել են հատկապես 2022 թվականի սեպտեմբերի Ադրբեջանի հարձակման պատճառով, Հայաստանի դիրքորոշումը շարունակում է մնալ լեգիտիմ․ «Մեր դիրքորոշումը լեգիտիմ է ու բխում է ՀՀ շահերից»,- ասել է նախարարը՝ նշելով, որ երկրում առկա խնդիրների լուծման համար կարևոր է հավասարակշռված ու տարբեր ուղղություններով աշխատանքը։

Նա  անդրադարձավ ՀԱՊԿ-ի հետ համագործակցության սառեցմանը, նշելով, որ Հայաստանը վերջին շրջանում հրաժարվել է ՀԱՊԿ-ի ֆինանսավորմանը մասնակցելուց, չի մասնակցում համատեղ զորավարժություններին ու հանդիպումներին։ «Նախքան, որ մեր գործընկերները փոխեն իրենց դիրքորոշումը, մենք չենք փոփոխելու մեր վերաբերմունքը»,- շեշտել է Պապիկյանը։ Նախարարն ընդգծեց, որ Հայաստանը չի դիմել ՀԱՊԿ-ից դուրս գալու գործընթաց սկսելու համար, սակայն այդ ուղղությամբ քայլերը հնարավոր են, եթե դաշինքի անդամները շարունակում են թերագնահատել Հայաստանի անվտանգության սպառնալիքները։

Սյուզաննա Խառատյան