«Ինչպես նախկինում, Հայաստանին համարում ենք դաշնակից»․ՀԱՊԿ-ի արձագանքը ՀՀ արտաքին հետախուզական ծառայության հայտարարությանը
ՀՀ արտաքին հետախուզության ծառայության զեկույցում նշված է, որ քիչ հավանական է, որ 2025-ին Հայաստանի կողմից ՀԱՊԿ անդամության սառեցման հիմքերը վերանան
Չնայած ՀՀ արտաքին հետախուզության ծառայության հայտարարության, ՀԱՊԿ-ը շարունակում է Հայաստանին համարել դաշնակից։ Այս մասին ՏԱՍՍ-ին հայտնել է կազմակերպության աղբյուրը։
Հիշեցնենք, որ ՀՀ արտաքին հետախուզության ծառայության զեկույցում նշվել է՝ «քիչ հավանական է, որ 2025-ին Հայաստանի կողմից ՀԱՊԿ անդամության սառեցման հիմքերը վերանան, և որ, իրենց գնահատմամբ, անվտանգային այս կառույցի հեղինակությունը կշարունակի մնալ էականորեն կասկածի տակ»։
Ըստ զեկույցի՝ «ՀԱՊԿ անգործունակությունը Հարավային Կովկասում արձագանքելու այն խնդիրներին, որոնք ՀԱՊԿ կանոնադրական նպատակներն են, 2025 թվականին ամենայն հավանականությամբ չի փոխվի»։
ՏԱՍՍ գործակալության աղբյուրը նշել է, որ կազմակերպության քարտուղարությունը ծանոթ է ՀՀ արտաքին հետախուզության ծառայության հայտարարությանը․«Սակայն, մենք, ինչպես նախկինում, Հայաստանին համարում ենք դաշնակից և աշխատանքային ռեժիմով շարունակում ենք աշխատել Երևանի հետ»։
Նիկոլ Փաշինյանը 2024-ի սեպտեմբերին հայտարարեց, որ ՀԱՊԿ-ը սպառնալիքներ է ստեղծում Հայաստանի անվտանգության, ՀՀ հետագա գոյության, ինքնիշխանության եւ պետականության համար՝ հավելելով՝ դրա համար է Երևանը սառեցրել իր անդամակցությունն այդ կազմակերպությունում։
2022 թվականին, երբ ադրբեջանական զինված ուժերը ներխուժեցին Հայաստանի ինքնիշխան տարածք, ՀԱՊԿ-ը չպաշտպանեց իր անդամ երկրին, ոչ մի կերպ չարձագանքեց Ադրբեջանի ագրեսիային, Հայաստանը քննադատեց կազմակերպությանը, որոշ ժամանակ հետո հայտարարեց, որ սառեցնում է անդամակցությունը։
Պաշտոնական Մոսկվան Հայաստանի հայտարարություններին ի պատասխան, մշտապես պատճառաբանում է, թե Հայաստան-Ադրբեջան սահմանը սահմանազատված չէ։
