ԱԳ փոխնախարարը պարզաբանում է, թե ինչու է սահմանային անվտանգության հարցերով ամերիկյան խումբը այցելելու ՀՀ, արդյոք ռուս սահմանապահները դուրս կգան հայ-իրանական սահմանից
ՀՀ ԱԳ փոխնախարար Պարույր Հովհաննիսյանի ներկայացմամբ՝ Բլինքենի նշած սահմանային անվտանգության հարցերով ամերիկյան խմբի ՀՀ այցը վերաբերում է մեր սահմանային հսկողության արդյունավետության բարձրացմանը, իրանական կողմն այս առնչությամբ դժգոհություն չի հայտնել
Իրանցի գործընկերների հետ Հայաստանը քննարկում է բոլոր հարցերը, բայց ԱՄՆ պետքարտուղարի նշված հարցը վերաբերում էր մեր սահմանային հսկողության արդյունավետության բարձրացմանը, ոչ թե այս կամ այն երկրի հետ որևէ հատուկ զգայուն ասպեկտներին: Այս մասին այսօր խորհրդարանում լրագրողների հետ ճեպազրույցում ասաց ԱԳ փոխնախարար Պարույր Հովհաննիսյանը՝ պատասխանելով հարցին՝ հայ-ամերիկյան ռազմավարական գործընկերության փաստաթղթի ստորագրումից հետո ԱՄՆ պետքարտուղար Բլինքենը հայտարարել է, որ մաքսային և սահմանային անվտանգության հարցերով ամերիկյան թիմն առաջիկայում այցելելու է Հայաստան՝ սահմանային անվտանգության հետ կապված, որքանո՞վ է դա առնչվում Իրանին և արդյոք իրանցի գործընկերների հետ քննարկվել է այս հարցը:
Փոխնախարարն ասաց, որ վերջերս Հայաստանի ԱԳ փոխնախարար Վահան Կոստանյանն այցելել էր Իրան եւ որեւէ մտահոգություն, մտավախություն իրանական կողմից չի հնչել. «Հայտարարությունը, որը հրապարակվել էր, եւս մեկ անգամ վկայությունն է մեր սերտ եւ հատուկ համագործակցային հարաբերությունների դրսևորման։ Ես չեմ տեսել որեւէ հարց, որի շուրջ չհասնենք իրանական կողմի հետ համաձայնության։ Մեր հարաբերություններն աննախադեպ բարձր մակարդակի վրա են։ Դրա վկայությունը տեսնում ենք, թե՛ վերջին շրջանում այցերի, թե՛ այլ պաշտոնյաների հայտարարություններից ելնելով»։
Հարցին՝ ի՞նչ է նշանակում «սահմանային կարողությունների ամրապնդում», Հովհաննիսյանը պատասխանեց.«Միշտ դա իրականացվել էր երրորդ երկրի կողմից, վերջապես պետք է մեր սահմանը կարողանանք ինքներս վերահսկել»:
Հստակեցնող հարցին՝ արդյոք դա նշանակում է, որ այդ աշխատանքների արդյունքում հայ-թուրքական, հայ-իրանական սահմաններից ռուս սահմանապահները հնարավոր է առհասարակ դո՞ւրս գան, փոխնախարարը պատասխանեց․«Իհարկե, իդեալական աշխարհում ամեն մի երկիր պետք է ի վիճակի լինի վերահսկել իր սահմանները: Իսկ այդ աջակցությունը գտնվում է մեր կարողությունների բարձրացմանը համապատասխան փորձառության կիսմամբ»:
Նիկոլ Մարգարյան
