«Չեմ կարծում, որ հրդեհից 15 հոգի չկարողանային դուրս գալ կացարանից»․ինչպե՞ս կարող էր այդ փոքր սենյակում մահճակալների արանքի հատակը չայրվեր, այրվեին միայն մահճակալները, որտեղ քնած են եղել զինվորները
Զինվորական կացարանի հրդեհի գործով դատական նիստի ընթացքում հարց հնչեց՝ հնարավո՞ր է կրակը տարածվի, հետո ընդհատվի, ապա կրկին տարածվի, ու այրվածք առաջացնի, վկան պատասխանեց, որ եթե բենզինը տարածվում է, ապա անխոչընդոտ շարունակվում է այրումը
Գեղարքունիքի մարզի Ազատ գյուղի զինվորական կացարանում տեղի ունեցած ողբերգական հրդեհի գործով այսօրվա դատական նիստում հարցաքննվեց ՀՀ ԶՈՒ թիկունքի վարչության հրդեհային անվտանգության ծառայության նախկին պետ՝ Սարգիս Մազմանյանը:
Տուժողների շահերի ներկայացուցիչ Նորայր Նորիկյանի այն հարցին, թե այդ զորամասում նախկինում տեղի ունեցած հրդեհի վերաբերյալ ի՞նչ տեղեկություններ ունի, վկան կոնկրետ տեղկություններ չտվեց, ասաց, որ այս պահին չի կարող նման բան հիշել:
Վկայի խոսքով՝ այս գործն իր համար էլ անհասկանալի է, և որ իր պաշտոնավարման ընթացքում՝ 2021-2022 թվականներին տարբեր զորամասերում հրդեհի բռնկման շուրջ 15 դեպք է տեղի ունեցել, որոշ զինծառայողներ տարբեր աստիճանի այրվածքներ են ստացել, սակայն նրանցից ոչ մեկը կոնկրետ հրդեհի հետևանքով չի մահացել:
«Չեմ կարծում, որ հրդեհից 15 հոգի չկարողանային դուրս գալ կացարանից»,-նշեց Մազմանյանը:
Նորայր Նորիկյանն ասաց, որ դեպքից հետո տեղում ծնողների կատարած ուսումնասիրության ընթացքում հայտնաբերվել են զրահաբաճկոններ, որոնք այրված չեն, կամ չեն կրել այնպիսի վնաս, ինչպիսին ենթադրվում է նմանատիպ հրդեհի պայմաններում: Սարգիս Մազմանյանն այս առնչությամբ ասաց․«Ես յութուբյան ալիքում եմ տեսել, թե ինչպես է կացարանը վառվում, և չեմ կարծում, որ նմանատիպ զրահաբաճկոնները կարող են ամբողջական մնալ, կամ այրվել մակերեսորեն՝ 5-10 տոկոսի չափով: Բայց հնարավոր է նաև, որ զրահաբաճկոնների վրա ինչ-որ իր գցված լիներ, որպեսզի դրանք չփոշոտվեին»:
Վկայի այս խոսքերին զոհված զինծառայողների ծնողներն արձագանքեցին.«Զրահաբաճկոններն իրար վրա շարված են եղել պատի տակ, կողքին եղել է զենքի արկղ, որը չի այրվել, մինչև այսօր էլ դրանք չեն տեղաշարժվել»:
Նորիկյանը դատարանին ներկայացրեց լուսանկարներ դեպքի վայրից, հարցրեց՝ ինչպե՞ս է հնարավոր, որ այդ փոքր սենյակում մահճակալների արանքների հատակը այրված չէր, այրված էին միայն մահճակալները, որտեղ քնած են եղել զինվորները։ «Պատկերը շատ պարզ է, կացարանի հենց այս պատի տակ դրված են եղել առաջին մահճակալները, որոնք այրված են, հետո մահճակալների երկրորդ շարքն է, իսկ դրանց մեջտեղում արդեն մաքուր է: Ինչպես կարող էր հրդեհը տարածվել, ընդհատվել, հետո կրկին տարածվել և այրվածք առաջացնել»,-հարցրեց Նորիկյանը։
Ի պատասխան հարցի վկան ասաց․«Չեմ կարծում, թե հնարավոր կլիներ, որ մենակ մահճակալների տակը ու միջանկյալ հատվածն այրված չլիներ։ Եթե բենզինը տարածվել է, խոչընդոտ չունի, ամբողջովին տարածվելով գնում է, տարածքում պետք է համապարփակ այրվածքներ լիներ։ Ինչքան հրդեհի ուսումնասիրություն եմ արել, հրդեհաշիջումների եմ մասնակցել, հիմնականում որտեղ հրդեհը տեղի է ունեցել, առնվազն 90 տոկոսը այրված է եղել, գուցե 10 տոկոսը ոչինչ եղած չլինի։ Իմ պրակտիկայի ընթացքում ես նման բան չեմ տեսել։ Բայց չստելու համար կամ այլ վարկածներ առաջ չբերելու համար չեմ էլ հերքի, որ հնարավոր է։ Հնարավորությունն էլ չեմ կարող ապացուցել։ Չեմ էլ կարող ապացուցել այն հանգամանքը, թե ինչու է տենց բան եղել։ Նախադեպը չունեցող հրդեհ է եղել, շատ բաներ ինձ համար էլ են անհասկանալի»։
2023 թվականի հունվարի 19-ին Գեղարքունիքի մարզի Ազատ գյուղում տեղակայված ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող։
Նիկոլ Մարգարյան
