2024-ին համարյա չենք կրակել մեկս մյուսի վրա, բայց ամեն խաղաղ օրը ճի՞շտ ենք օգտագործել նույն բանակի հիմքերը ավելի ամրացնելու տեսանկյունից․Անդրանիկ Քոչարյան

ՔՊ-ական պատգամավորի ներկայացմամբ՝ մեր նպատակն է ունենալ ժամանակակից սպառազինություն և դա կիրառելու համար լավ գիտելիքներ ունեցող զինվորականություն

«Սարերը դրեք մի կողմ, Փաշինյանի ասածները խորությամբ ընկալեք»,-այսպես «Եռաբլուր» պանթեոնում լրագրողների հետ ճեպազրույցում արձագանքեց ԱԺ «Քաղաքացիական պայմանագիր» խմբակցության անդամ Անդրանիկ Քոչարյանը, երբ լրագրողները փորձեցին մեկնաբանություն ստանալ Փաշինյանի՝ «Մենք Արարատի դիսկուրսի ներքո չենք կարող ունենալ մարտունակ բանակ»  հայտարարության մասին։

Քոչարյանը համեմատականներ տանելով բանակի նախկին և ներկա վիճակի միջև, ասաց.«Բանակի առջև դրված խնդիրներն են փոխվել: Բանակը 94-ից հետո լրիվ այլ վիճակի էր բերված, իսկ վաղվա բանակը պետք է լինի այնպիսին, որպեսզի նման խնդիրներ չառաջանան, ինչի առաջ մենք կանգնեցինք 44-օրյա պատերազմի հետևանքով»:

Նրա խոսքով՝ բանակաշինությանն ուղղված բյուջեի ծավալները տարեցտարի ավելանում են՝ հասնելով այնպիսի մակարդակի, ինչպիսիք երբեք չեն եղել, և այժմ ամենակարևորը այդ միջոցներն արդյունավետ ծախսելն ու բանակի կարողությունները ավելացնելն է:

Հարցին՝ ի՞նչ կարծիք ունի սահմանազատումը Տավուշից սկսելու և շարունակելու վերաբերյալ, Քոչարյանը նշեց, որ ամենակարևորը սահմանազատումը սկսելն ու ավարտելն է, հատվածական խնդիրները պրոբլեմ չեն, կարևոր է, որ հանկարծ գործընթացքը չկասեցվի․«Վերջին հաշվով 2024 թվականի ամենաէական, այսպես շոշափելի ձեռքբերումը ո՞րը կարող եք համարել, մենք համարյա չենք կրակել, չէ՞ մեկս մյուսի վրա, բայց ամեն մի խաղաղ օրը մենք ճի՞շտ ենք, լա՞վ ենք օգտագործել նույն բանակի հիմքերը ավելի ամրացնելու տեսանկյունից, մեկս մյուսին հանդուրժելու տեսանկյունից: Չէ»:

Քոչարյանի ներկայացմամբ՝ մենք բանակի հաղթանակների համար պարտական ենք մեր ժողովրդին, որ զրկանքները կրելով՝ տվեց հնարավորություն, որպեսզի այդ բանակը կերտի հաղթանակներ․« Ինչից ինչ ունեցանք և հետո ինչից ինչ դարձանք և հետո բնականաբար ճոճանակը շարժվել է տարբեր ուղղություններով, այսօր մենք այդ ճոճանակի շարժը պետք է բարձրացնենք դեպի վերև՝ ի նպաստ մեր երկրի անվտանգության»:

Դիտարկմանը, որ Ադրբեջանը բանակաշինության գործում շեշտը դնում է մոբիլ փոքր խմբերի վրա Անդրանիկ Քոչարյանն այսպես արձագանքեց․«Պետք է ունենալ ժամանակակից սպառազինություն և դա կիրառելու համար լավ գիտելիքներ ունեցող զինվորականություն։ Դա է մեր նպատակը, դա է մեր քաղաքականությունը, որը մենք քայլ առ քայլ փորձում ենք դարձնենք իրականությանը։ Դա շատ բարդ ճանապարհ է, որ մենք հիմա անցնում ենք, որովհետև 44-րդ պատերազմից հետո մենք արձանագրեցինք, թե որտեղ ենք կանգնած եղել պատերազմից առաջ և ուր պետք է հասնենք, որպեսզի հեռու պահենք հնարավոր բոլոր պատերազմները, եթե այդպիսի ցանկություն ունենան մեր հակառակորդները»:

Նիկոլ Մարգարյան