Այդ պաշտոնյաների մի մասը վաղուց պետք է փոխվեր. Մակարյանը՝ կադրային փոփոխությունների մասին
Փոքր բիզնեսը ավելի շատ սոցիալական, քան տնտեսական նշանակություն ունի, պետությունը պետք է մտածի՝ որ կոմպոնենտն է ուզում զարգացնել,- REGIONS TV-ի հետ զրույցում անդրադառնալով շրջանառության հարկի համակարգում կատարված փոփոխություններին, հայտարարեց Գործատուների հանրապետական միության նախկին նախագահ Գագիկ Մակարյանը։
«Օրինակ՝ հաշվապահական ընկերությունները պետությանն օգուտ են բերում այն առումով, որ մյուսներին դրդում են թափանցիկ աշխատել: Փոխարենը մենք սա խրախուսենք, գալիս ասում ենք՝ դու սկսել ես ավելի շատ փող աշխատել, ծառայությունների թիվն ավելացել է, պետք է սկսես ավելի շատ հարկեր վճարել: Նույնն էլ իրավաբանական ծառայության դեպքում․ սա էլ մարդկանց իրավունքի, քաղաքակրթության, հավասար վերաբերմունքի հնարավորություններ է ստեղծում: Փողը մի կողմ, բայց կան արժեքներ, որոնք պետության համար ավելի բարձր պետք է լինեն»:
Մակարյանի խոսքով՝ հարց է առաջանում՝ ինչո՞ւ են իրավաբանական ծառայություններն ավելացել, պետությունը պետք է ուսումնասիրի, մարդկանց լուծումներ առաջարկի։
«Նաև պետք է խորանան՝ ինչո՞ւ է իրավաբանական ծառայությունների պահանջարկն ավելացել, եթե բնակչության թիվը չի ավելացել, բիզնեսի թիվն էական չի փոխվել: Քաշքշուկները դատարաններում, խաբեությունները, խարդախությունները, տարբեր այլ երևույթներ առաջացնում են իրավաբական ծառայություններից օգտվելու անհրաժեշտություն»,-ընդգծեց Գործատուների հանրապետական միության նախագահը:
Մակարյանն անդրադարձավ նաև հարցին, թե ինչու Նիկոլ Փաշինյանը մեկ օրում կառավարական կաբինետում էական կադրային փոփոխությունների գնաց։
«Այդ պաշտոնյաների մի մասը վաղուց պետք է փոխվեր, ո՞վ ասաց, որ իրենց վարքագծով, հոգեբանությամբ, գիտելիքով արժանի էին պաշտոնյա լինելու: Պրոֆեսիոնալիզմը միայն գիտելիքը չէ, նաև սկզբունքներն են, արժեքները, հետևողականութունը, նրանց մեծ մասը չուներ այդ մղումները: Վերջին հաշվով, եթե տարբեր պաշտոնյաներ չեն կատարում իրենց պարտականությունները, կուժն ու կուլան կառավարության ղեկավարի գլխին է կոտրվում»,-նշեց Մակարյանը:
