Առողջական խնդիրներով երիտասարդներին զորակոչում են բանակ․նախարարի պարզաբանումը
Առողջապահության նախարար Անահիտ Ավանեսյանը վստահեցնում է, որ բժշկական հանձնաժողովները մանրակրկիտ փորձաքննություններ են իրականացնում, որպեսզի վստահ լինեն, որ անձը ճիշտ է փորձաքննվել
Իրավապաշտպաններն անցած տարի բազմիցս ահազանգել են, որ 3 տասնյակից ավելի երիտասարդներ առողջական խնդիրներով զորակոչվել են բանակ։ Այսօր հրավիրած ասուլիսում լրագրողներից մեկը աողջապահության նախարար Անահիտ Ավանեսյանից հետաքրքրվեց՝ արդյոք նրան, որպեսզ առողջապահության ոլորտի պատասխանատու չի՞ հուզում այս խնդիրը։ Ընդ որում, լրագրողն օրինակ բերեց՝ տեսողական խնդիրներով երեխան բոլոր գործընթացներն անցել է, ճանաչվել ոչ պիտանի ծառայության համար, մեկ էլ հանկարծ ՊՆ-ն դա չի ընդունում ու զորակոչում է բանակ։
Այս առնչությամբ նախարարն ասաց․«Զորակոչն ընդհանուր Պաշտպանության նախարարության տիրույթում է, բայց մենք որպես առողջական հատվածի պատասխանատու՝ շատ սերտ համագործակցում ենք ոչ միայն ընթացիկ գործընթացը կազմակերպելու եւ դրա շրջանակներում առաջացած հարցերին անդրադառնալու, այլ նաև հստակեցնելու մեր իրավական կարգավորումները եւ կառավարության 404, 405 որոշումների վերանայման առումով, որը բերում է հիվանդությունների սահմանման, ախտորոշման եւ տարբեր սահմանափակումներով ծառայությունների հնարավորությունների»։
Ըստ նախարարի՝ երբ մարդն ունի առողջական խնդիր եւ այնպիսի ախտորոշում, որն ընկնում է տվյալ հոդվածի տակ, նրա վերաբերյալ պետք է կայացվի տարկետման կամ ազատման որոշում:
Նա պարզաբանեց՝բժշկական հանձնաժողովները, հենվելով թե՛ անձի կողմից իր միջոցներով իրականացված հետազոտությունների, եւ թե՛ պետպատվերով իրականացված փորձաքննությունների վրա, կայացնում են որոշում՝ տվյալ ախտորոշումն արդյոք համապատասխանո՞ւմ է սահմանափակման հոդվածին, թե՞ ոչ․«Մենք նաեւ աշխատում ենք իրավապաշտպան կազմակերպությունների հետ: Բոլոր բողոքների հետ կապված՝ պետք է առանձին դեպքերով հասկանալ՝ արդյոք կա՞ խնդիր, և որն է խնդիրը: Ընդհանուր առմամբ կարող եմ ասել, որ մեր բժշկական հանձնաժողովները մանրակրկիտ փորձաքննություններ են իրականացնում, որպեսզի վստահ լինեն, որ անձը ճիշտ է փորձաքննվել: Որեւէ մեկը չի ուզում, որ հետո խնդիրներ առաջանան, երբ մարդն արդեն զորակոչվում է։ Այսքանը կարող եմ ասել։ Կոնկրետ խնդրով մենք պատարստ ենք նայել՝ հասկանալու ինչն է խնդիրը, եթե կա բացթողում»։
Լուսանկարը՝ Առողջապահության նախարարության ֆեյսբուքյան էջի
