«Մեր բյուջեն անսահմանափակ չէ․մեր խոստումը կատարել ենք՝ քաղաքացին անհետաձգելի բուժօգնությունը ստանում է նույն րոպեին»․նախարարը պետպատվերի ավարտվելու մասին

Առողջապահության նախարար Անահիտ Ավանեսյանը վստահեցնում է, որ պետպատվերով բուժօգնություն ստանալու համար հերթեր չեն գոյանում, եթե անգամ կան, նորմալ են, դրանք պլանային բուժօգնության հերթեր են

«Նախ շատ կարևոր է ճիշտ ակնկալիքներ ձևավորելը։ Որեւէ բան անսահման չի լինում, առավել եւս, եթե դա կապված է բյուջեի հետ: Առողջապահությունն ունի տարեկան բյուջե, որի շրջանակներում իրականացնում է բուժսպասարկումը»,-այս մասին այսօր հրավիրված ասուլիսում ասաց առողջապահության նախարար Անահիտ Ավանեսյանն՝ անդրադանալով բուժհաստատություններում տարեվերջին պետպատվերի սպառմանը, ինչի շուրջ մեծ դժգոհություններ կան, մանավանդ որ նախարարությունը հայտարարել էր, որ այլևս նման խնդիր չի լինելու, քանի որ բուժկենտրոններն իրենց մատուցած ծառայությունների դիմաց կստանան համապատասխան ֆինանսավորումը։

Հիշեցնենք, որ դեռ 2019-ին Նիկոլ Փաշինյանը պետպատվերի բաշխման նոր համակարգի մասին խոսելիս, ասել էր՝ ոչ թե պացիենտն է գնալու գումարի հետևից, այլ՝ գումարն է գնալու պացիենտի հետևից։

Անահիտ Ավանեսյանը պատասխանելով պետպատվերի վերջանալու մասին հարցին, ասաց․«Օֆերտայի տրամաբանությունը նրանում է, որ ոչ թե ամեն բժշկական կենտրոն ունի պայմանագրային գումար եւ սահմանափակ ծառայությունների շրջանակ, տարիներ ի վեր այդպես էր մեր պետպատվերի տրամաբանությունը, այլ մենք ունենք ամեն ծրագրի տարեկան, եռամսյակային եւ ամսեկան ընդհանուր չափեր, թե ինչքան կարող ենք ծառայություններ մատուցել: Եվ ես դրա համար կխնդրեմ մեր քաղաքացիների մոտ սխալ ակնկալիքներ չսերմանել՝ ասելով, որ ամեն ինչ պետք է լինի անսահմանափակ: Որևէ բան անսահմանափակ չի լինում։ Հայաստանում մեր օֆերտայի շրջանակներում կան տարեկան եւ ֆիզիկական հասանելիության հնարավորություններ, նաեւ մեր բուժհաստատությունների ռեսուրսներն ու ֆինանսական միջոցներն անսահմանափակ չեն»։

Ըստ Ավանեսյանի՝ նախարարությունը հասել է նրան, որ քաղաքացիները սպասարկվում են ըստ դիմելիության։

Նախարարը վստահեցրեց՝ անցյալ տարի բուժսպասարկումից օգտվելու հերթերը երկու ամսից ավելի չեն ձգվել․«Միայն դժվարամատչելի հետազոտությունների մասով մեկ-երկու շաբաթ կարող է լինել, մինչև երեք ամիս, բայց ընդհանուր առմամբ, վերջին չորս ամիսներին անձը դիմել է բուժօգնության և ստացել այն։ Սա նշանակում է, որ մենք մեր խոստումը կատարել ենք քաղաքացին իր կարիքին համապատասխան անհետաձգելի բուժօգնությունը ստանում է նույն րոպեին՝ եթե անհրաժեշտ է։ Պլանային բուժօգնությունը ստանում է հերթագրման սկզբունքով, այդ հերթերն էլ այնպես են կառավարվում, ֆինանսական միջոցներն էլ այնպես են ուղղվում, որպեսզի քաղաքացին երկար չսպասի»։

Հայաստանում հերթագրման համակարգը հիմա այնպիսին է, ըստ Ավանեսյանի,  որ   անգամ եթե լինում են հերթեր, թեև դրանք չկան, դա համարվում է պլանային բուժօգնության համար նորմալ հերթեր։

Լրագրողի հարցին՝ մի շարք բուժկենտրոններ դժգոհում են, որ պետությունը չի կատարել բուժհաստատությունների նկատմամբ ֆինանսական պարտավորությունները դեկտեմբերի 1-16 ժամանակահատվածի համար, նախարարը պատասխանեց՝  առողջապահության համակարգի ֆինանսավորման մեխանիզմն այնպիսին է, որ տարին նախարարության համար ավարտվում է  դեկտեմբերի 15-ին, 16-ին ամփոփվում  է տասնհինգ օրվա տվյալները։

Նա նշեց, որ հաջորդ տասնհինգ օրվա կատարողականի ամփոփումը ու դրա հիման վրա ֆինանսավորումը մշտապես իրականացվել է ոչ թե հունվարին, այլ՝ փետրարին։
Նախարարը վստահեցրեց՝ այս տարի այդ մոտեցումը փոփոխել են․«Փակել ենք մինչև դեկտեմբերի 15- ն ընկած ժամանակհտվածն ու դրա վճարումներն իրականացրել ենք նախորդ ամիսների միջին ցուցանիշի վրա հենվելով։ Ամփոփելով տեսել ենք, որ միջին ցուցանիշից հավելյալ ծաայություններ են մատուցել, ինչը նորմալ է բայց դեռ ուսումնասիրվում է։ Երբ մենք վստահ կլինենք, որ այդ հավելյալ ծառայությունները հավաստի են ու մատուցված են, հաջորդ ֆինասավորումը կիրականացվի։ Այս տարի առաջին անգամ ենք անում, որ հունվարին կստանան այս 15 օրվա ու դեկտեմբերի  գումարը։ Մինչև շաբաթվա վերջ կստանան»։