«Հայաստանում կարծես թե չեն սպասում հայ գերիների վերադարձին»․ Հայկ Մամիջանյան

ՀՀ ԱԳ նախարարության շենքի դիմաց այսօր մի խումբ քաղաքացիներ, հանրային գործիչներ, այդ թվում՝ Արցախի նախկին պետնախարար Ռուբեն Վարդանյանի համախոհները բողոքի ցույց էին անում՝ ի աջակցություն Բաքվի բանտում պահվող և շինծու դատավարության զոհ Արցախի ռազմաքաղաքական ղեկավարության և այլ պատնադառու անձանց։ Ցույցի մասնակիցներն իրենց հետ բերել էին պաստառներ, որտեղ պատկերված է Ռուբեն Վարդանյանի վերջին դատական նիստերից լուսանկարներ՝ Վարդանյանի հյուծված տեսքով, ենթադրաբար՝ խոշտանգման հետքերով։

Ցույցի մասնակիցնրերն ավելի վաղ պահանջում էին, որ ՀՀ ԱԳՆ-ն հրատապ հայտարարություն տարածի, ինչն այսօր առավոտյան տեղի ունեցավ, բացի այդ, նրանք նաև պահանջում են , որ ԱԳՆ ազմակերպի դիվանագետների հանդիպում՝ հանդես գալով պահանջներով։

«Ապրելու երկիր» կուսակցության համահիմնադիր Մեսրոպ Առաքելյանը մտահոգություն  հայտնեց՝ ինչու Հայաստանի իշխանությունները չեն արձագանքում Ադրբեջանում   խոշտանգումների ենթարկված հայ գերիների խնդրին, մասնավորապես՝ Ռուբեն Վարդանյանի նկատմամբ գործադրվող վայրագություններին։ Նրա խոսքով՝ Վարդանյանը արդեն 10 օր է՝ ինչ հացադուլ է հայտարարել, իսկ նրա դեմքին երևացող խոշտանգման հետքերը ու դատական նիստի ժամանակ նրա ինքնազգացողության վատացումը բացահայտ վկայում են Ադրբեջանի դաժան գործողությունների մասին։

«Ապրելու երկիր» կուսակցության ներկայացուցիչը, անդրադառնալով Ռուբեն Վարդանյանի շուրջ տեղի ունեցող զարգացումներին, ընդգծեց՝ միջազգային նորմերի համաձայն՝ հացադուլ հայտարարած մարդիկ ազատվում են դատական նիստերից, սակայն Վարդանյանը, ստիպված է եղել մասնակցել նիստին՝ չնայած իր ծանր առողջական վիճակին։

«Չի կարող լինել խաղաղություն առանց գերիների վերադարձի»,-հայտարարեց Առաքելյանը, նշելով՝ եթե հայկական իշխանությունները շարունակում են լռել, դա միայն նպաստում է ադրբեջանական բռնապետության ամրապնդմանը։

Ցույցի մասնակիցները դատապարտեցին Հայաստանի կառավարության և միջազգային հանրության լռությունը, նշելով, որ դա համարվում է Ադրբեջանի վայրագություններին աջակցություն։ Ըստ նրանց, Հայաստանի արտաքին քաղաքականության օրակարգում պետք է ներառվի Բաքվում գտնվող հայ գերիների վերադարձի հարցը։

ՀՀ ԱԺ «Պատիվ ունեմ» խմբակցության պատգամավոր Հայկ Մամիջանյանը ևս իր մտահոգությունը հայտնեց Հայաստանի արտաքին քաղաքականության և գերիների վերադարձի վերաբերյալ։ Նա նշեց, որ ԱԳ նախարարությունից որևէ ակնկալիք չունի, թեև ըստ նրա՝ միջազգային բարձրաստիճան ղեկավարներ են նշել, որ Հայաստանում կարծես թե չեն սպասում հայ գերիների վերադարձին։

«Հակափաստարկ, արձագանք չի եղել, բնականաբար, իրենք դրա հետ համաձայն են»,- նշեց նա՝ ընդգծելով, որ Հայաստանի իշխանությունները չեզոք դիրքորոշում են դրսևորում այդ հարցում։

Մամիջանյանը նաև անդրադարձավ վարչապետ Նիկոլ Փաշինյանին, ասաց, որ նա Ադրբեջանի բոլոր պահանջները ձգում է այնքան, որ հայ ժողովուրդը սկսի մոռանալ այդ մասին։ «Բայց հետո պարզվում է, որ այդ պահանջը, արդեն իրականացվել է»,-նշեց պատգամավորը։

Սյուզաննա Խառատյան