Հայաստանը դիմել է ԵՄ Խաղաղության հիմնադրամին աջակցության երրորդ ծրագրի համար
Հայաստանը դիմել է Խաղաղության եվրոպական գործիքի ներքո երրորդ աջակցության համար։ Այս մասին այսօր Ազգային ժողովի արտաքին հարաբերությունների մշտական հանձնաժողովում քննարկման ժամանակ հայտարարեց արտաքին գործերի նախարար Արարատ Միրզոյանը։
Նա նշեց, որ Հայաստանը ստացել է երկրորդ տրամադրումը 20 մլն եվրոյի աջակցության տեսքով և արդեն ներկայացրել է հաջորդ հայտը։
Այս տարվա հունվարին ԵՄ-ն հաստատել է Խաղաղության եվրոպական հիմնադրամից երկրորդ անգամ Հայաստանի զինված ուժերին աջակցություն տրամադրելու մասին որոշումը՝ հաղթահարելով ամիսներ տևած դիվանագիտական փակուղին և Հունգարիայի վետոն։
Առաջին աջակցությունը եղել է 2024-ին՝ 10 մլն եվրո։
Աջակցության նպատակն է հզորացնել Հայաստանի զինված ուժերի լոգիստիկ կարողությունները՝ առաջնահերթությունը տալով ճգնաժամային իրավիճակներում քաղաքացիական անձանց պաշտպանությանը։ Ծրագիրը նախատեսում է բարձրացնել երկրի դիմակայունությունը և արագացնել հայկական ստորաբաժանումների փոխգործակցությունը միջազգային, այդ թվում՝ ԵՄ խաղաղապահ առաքելություններին հնարավոր մասնակցության համար։
Արարատ Միրզոյանն ասաց, որ ԵՄ-ի հետ ընդլայնվել է համագործակցությունը պաշտպանական և անվտանգության ոլորտներում, տրվել է խորհրդակցությունների մեկնարկ և ուժի մեջ է մտել ճգնաժամային կառավարման գործողություններում Հայաստանի մասնակցության շրջանակը սահմանելու մասին համաձայնագիրը․«Սա նշանակում է որ մենք մեր ընտրությամբ կարող ենք մասնակցել Եվրոպական միության տարբեր քաղաքացիական առաքելությունների»։
