«Գրադարանը՝ նորարարության հարթակ»՝ Գեղարքունիքի տարբեր համայնքներում
Ապրիլին անցկացվում է Ազգային գրադարանային շաբաթը։ Այն մեկնարկեց ապրիլի 15-ին և կտևի մինչև ապրիլի 22-ը՝ «Գրադարանը՝ նորարարության հարթակ» կարգախոսով։
Սևանի Վահե Ստեփանյանի անվան կենտրոնական գրադարանի, Գրադարանների կենտրոնացված համակարգի Սևան համայնքի բնակավայրերի գրադարաններում շաբաթը հագեցած է տարբեր գրադարանային և մշակութային իրադարձություններով։
Սեմյոնովկայի գրադարանում կազմակերպվել է ցերեկույթ՝ նվիրված Պարույր Սևակի 100-ամյակին։
Զովաբերի գրադարանում ներկայացվել է «Հիշարժան տարեթվեր» խորագրով ցուցահանդես և գրական ցերեկույթ` նվիրված Վրթանես Փափազյանի 160-ամյակին։ Ցերեկույթի մասնակից երեխաները ընթերցել են գրողի ստեղծագործություններից։
Սևանի կենտրոնական գրադարանում Սևանի 4-րդ հիմն. դպրոցի 6ա դասարանի աշակերտները (դասղեկ՝ հայոց լեզվի և գրականության ուսուցչուհի Մերի Միքայելյան) ծանոթացել են գործող ցուցադրություններին։ Մանկական գրադարանում աշակերտները ծանոթացել են «Հեքիաթների աշխարհում» ցուցադրությանը։
Սևանի ավագ դպրոցի 10-րդ դասարանի աշակերտները (դասղեկ՝ Ռուզաննա Դալլաքյան, հայոց լեզվի և գրականության ուսուցչուհի Անահիտ Ավետիսյան) Սևանի կենտրոնական գրադարանում անցկացրել են բաց դաս-քննարկում՝ նվիրված հայ մեծանուն գրող Րաֆֆու կյանքին ու գործունեությանը։ Մասնակցում էին նաև դպրոցի մեթոդմիավորման նախագահ Արմինե Ղազարյանը ու հայոց լեզվի և գրականության ուսուցչուհի Էմմա Իսրայելյանը։ Քննարկումն անցավ հետաքրքիր մթնոլորտում՝ համեմված ասմունքով և հետաքրքիր փաստերի ներկայացմամբ։ Վերջում աշակերտները գրքեր նվիրեցին գրադարանին։
Սևանի ԳԿՀ Ծաղկունքի գրադարանում հյուրընկալվել են Ծաղկունքի այլընտրանքային մանկապարտեզի երեխաները՝ (դաստիարակներ` Լ. Մկրտչյան և Ա. Բադալյան):
Երեխաները շրջել են գրադարանում, ծանոթացել օգտվելու կանոններին, իրականացվող աշխատանքներին: Այնուհետև «Մանկական գրականություն» բաժնում երեխաներն ունկնդրել են Թումանյանի «Սևուկ ուլիկը» հեքիաթը:
Այնուհետ փոքրիկները խաղացել են հայկական ժողովրդական խաղեր՝ «Հանելուկախաղ» և «Համրախաղ», իսկ շրջայցի ավարտին արտասանել քառյակներ։
Ազգային գրադարանային շաբաթը կշարունակվի մինչև ապրիլի 22-ը:
Անի Ղևոնդյան (Մոբայլ լրագրության դասընթացի մասնակից )
Ռեգիոնս TV, Գեղարքունիքի մարզ
