Չորացրած լավաշ, արդար յուղ, չեչիլ պանիր. Գյումրվա պանրխաշի վարպետաց դաս
Պանրխաշը հնագույն հայկական ուտեստ է: Այն ավելի շատ բնորոշ է Շիրակի դաշտավայրի բնակչությանը:
Գյումրիում դրա պատրաստումն այսօր արարողակարգի վերածվեց, ինչպես և առաջներում էր:
Աբովյան փողոցում տեղադրված տաղավարներում սննդի ծառայություն մատուցող օբյեկտները պանրխաշը պատրաստել են տեղում և հյուրասիրել զբոսաշրջիկներին ու տեղի բնակիչներին։
Լավաշը նախապես չորացրած, յուղն արդար, չեչիլ պանրին էլ գումարվում էր սոխառածն ու ամեն ինչ պատրաստ էր:
Որոշ վարպետներ Գյումրվա պանրխաշը ներկայացրեցին նորովի: Տեղ-տեղ խմբված գյումրեցիների կողմից համտեսներ ու քննարկումներ էին, ուտեստը համտեսում էին ու համեմատում:
Խոհարարները ներկայացնում էին իրենց ձեռքի գործն ու պատրաստման անհատական մեթոդների առավելությունները: Արարողակարգը տոնի էր վերածում ուղեկցող ազգային երգն ու պարը:
Միջոցառման ավարտին փառատոնին մասնակցած սննդի ծառայություն մատուցող բոլոր օբյեկտներին տրվել են հավաստագրեր, խորհրդանշական աստղով պարգևատրվել է նաև նախաձեռնության հեղինակ Անի Հակոբյանը:
Ելենա Ավետիսյան
