«Պայքարել ու կասեցնել կործանում տանող թափանիվը». Բագրատ Սրբազան
«Տավուշը հանուն հայրենիքի» շարժման առաջնորդ Բագրատ Սրբազանը գաղափարակիցների հետ այսօր Դավիթաշեն վարչական շրջանում էր, որտեղ զրուցեց երևանցիների հետ, պատասխանեց մարդկանց հուզող հարցերին։
Սրբազանն անդրադարձավ Նիկոլ Փաշինյանի Տավուշ կատարած վերջին այցերին: «Երկու օր առաջ նեռը հանդիպել էր Բերքաբերի ժողովրդին և դարձյալ պետության ամբողջ սահմանի կառուցվածքը, պետության գոյությունը դրել էր մի քանի գյուղացիների ուսերին՝ որպես պարտավորություն ու պատասխանատվություն։ Սա խաբեություն է, երբ մարդը ամբողջ հայրենիքի գոյության պատասխանատվությունը դնում է մի քանի գյուղացիների ուսերին»,-նշեց Բագրատ Սրբազանը։
Այս հանդիպմանը ևս Սրբազանը խոսեց շարժման գաղափարից ու նպատակներից՝ ընդգծելով՝ փրկվելու այլ ճանապարհ չունի մեր երկիրը, քան պայքարել ու կասեցնել կործանում տանող թափանիվը:
«Նեռը պետք է հեռանա մեր կյանքից, չարիքը պետք է հեռանա մեր կյանքից։ Բարիքը պետք է հաղթի, բարիքի ձգտող ժողովուրդը չի կարող չարիքի պաշտամունք ունենալ։ Այդ անպետք կուռքի մասին Սուրբ Գիրքն է խոսում, որ կուռքեր սարքեցիք մարդկանց կերպարանքներով կամ այլ տեսքով և սկսեցիք պաշտել։ Եվ դա չարիքի ամենամեծ արտահայտությունն է մեր կյանքում»,-հայտարարեց նա։
