«Ի՞նչ է նշանակում ցեղասպանի հետ առանց նախապայմանների խաղաղություն»
Աներևակայելի ցասում կա մարդկանց մոտ Փաշինյան-Էրդողան հանդիպումից հետո: Նման կարծիք հայտնեց ՀՀ ԱԺ «Հայաստան» խմբակցության պատգամավոր Լիլիթ Գալստյանը:
«Շոկայինը Էրդողանի հետ բուն հանդիպման փաստը չէ. մենք, իհարկե, խաղաղությանը դեմ չենք, բայց ի՞նչ է նշանակում ցեղասպանի հետ առանց նախապայմանների խաղաղություն: Գնալ և չհստակեցված օրակարգով Թուրքիայի տանը հանդիպել մի երկրի ղեկավարի, որը քո ցեղասպանության շահառուներից է, որի բայրաքթարների տակ մենք 5000 զոհ ունենք, որը Ադրբեջանի հետ կիսում է բոլոր հանցագործությունների պատասխանատվությունն ու մեզ հետ խոսում ագրեսիվ հռետորաբանությամբ, սա ոչ միայն քաղաքական արժանապատվության զրո մակարդակի մասին է խոսում, այլ նաև՝ մարդկային արժանապատվության: Սա մեր ազգային-պետական շահի տոտալ ոչնչացման, այդ շահի չգիտակցման մասին է խոսում»,-նշեց ԱԺ պատգամավորը:
Գալստյանը վստահ է՝ օրվա իշխանությունը ուզում է ամեն գնով պահել սեփական աթոռը, պատրաստ է ճանապարհին զոհել հնարավոր ամեն ինչ:
«Նիկոլ Փաշինյանի առաջարկած բովանդակությունը Հայաստանի հատվածական հանձնումն է: Մենք այսօր իրենց բերած «քաղաքական բովանդակության» զոհն ենք, Արցախի կորուստը հենց այդ «բովանդակության» հետևանքն է»,-ընդգծեց Գալստյանը:
