Վերանում է հայկական պետհամարանիշներով Իրան մուտք գործելու խնդիրը
«Արաս» ազատ տնտեսական գոտու փոխտնօրենը հայտնել է, որ քանի որ Հայաստանն արդեն միացել է Carnet de Passages կոնվենցիային, այսուհետ վերանում է հայկական պետհամարանիշներով Իրան մուտք գործելու խնդիրը: Այս մասին հայտնում է regionmonitor-ը:
Նա շեշտել է, որ հայկական պետհամարանիշներով մեքենաներին Իրան մուտքի թույլտվությունը կխթանի զբոսաշրջությունը:
Կապանում Իրանի գլխավոր հյուպատոս Աբեդին Վարամինը նշել է, որ այս խնդիրը միշտ դժգոհություն է առաջացրել հայկական կողմում, քանի որ սեփական մեքենաներով Իրան մուտք գործելու համար ստիպված էին զգալի գումարներ վճարել:
Սյունիքի մարզպետի խորհրդական Կարեն Բալյանն իր հերթին ընդգծել է, որ մուտքի դյուրացումը խթանի հայ զբոսաշրջիկների այցերն Իրան և հատկապես «Արաս» ԱՏԳ:
News.am-ն էլ տեղեկացնում է, որ Իրանի զբոսաշրջային և ավտոմոբիլային ակումբը նոր նախաձեռնություն է ներկայացրել՝ հեշտացնելու Հայաստանից տրանսպորտային միջոցների մուտքը Իսլամական Հանրապետություն, գրում է Tehran Times-ը:
Ծրագիրը, որն ուղղված է մաքսային ընթացակարգերի կրճատմանը և անդրսահմանային ճանապարհորդությունների արագացմանը, պաշտոնապես մեկնարկել է շաբաթ օրը Իրանի մշակութային ժառանգության, զբոսաշրջության և ձեռարվեստի նախարար Ռեզա Սալեհի Ամիրիի մասնակցությամբ արարողության ժամանակ:
Նախաձեռնության շրջանակներում Իրան մեկնող Հայաստանի քաղաքացիներն այսուհետ կարող են իրենց տրանսպորտային միջոցների համար ստանալ Carnet de Passages կամ մաքսային տարանցման փաստաթուղթ, որը թույլ կտա նրանց երկիր մուտք գործել նվազագույն ուշացումով։
