«Ժամանակից դուրս». բաց հարթակ նրանց համար, ովքեր հետաքրքրված են պոեզիայով և գրականությամբ
Հոկտեմբեր 07,2024 14:41
Ոգէզարթաւնք մշակութային կենտրոնի և Ավետիք Իսահակյանի անվան գրադարանի նախաձեռնությամբ տեղի է ունեցել «Ժամանակից դուրս» գրական ցերեկույթը, որը նվիրված էր բանաստեղծուհի Թերեզա Հայրապետյանի ստեղծագործություններին: Էութեան թատրոնի դերասանները ներկայացրել են նրա պոեզիան՝ ստեղծելով խորիմաստ և զգացմունքային մթնոլորտ:
Ցերեկույթը շարունակական կլինի և կկայանա ամեն ամսվա վերջին ուրբաթ օրը: Յուրաքանչյուր հանդիպման ընթացքում հատուկ ուշադրություն է դարձվում ժամանակակից գրողներին, որպեսզի երիտասարդները ծանոթանան նրանց ստեղծագործություններին: Միջոցառման նպատակն է գրականությունը դարձնել ավելի հասանելի և գրավիչ՝ հատկապես երիտասարդների համար, ովքեր հնարավորություն կունենան ճանաչելու նոր հեղինակների և ծանոթանալու նրանց գրական ժառանգությանը:
«Ժամանակից դուրս» ցերեկույթների շարքը բաց հարթակ է բոլորի համար, ովքեր հետաքրքրված են պոեզիայով և գրականությամբ, հնարավորություն է երիտասարդներին ներգրավել պոեզիայի աշխարհ՝սերմանելով նրանց մեջ գրականության հանդեպ սեր ու հետաքրքրություն:
Կարապետ Կարապետյան
