Հրանտ Միքայելյան. ՀՀ Արտաքին հետախուզության ծառայության հայտարարությունը հիմնավորված չէ, այն կասկածներ է առաջացնում

«Հայաստանի ԱՀԾ (Արտաքին հետախուզության ծառայության) հայտարարությունը, թե որոշ երկրում ՀՀ քաղաքացիների նկատմամբ ճնշումների և առաջիկա ընտրական գործընթացներին միջամտության վերաբերյալ, սպառնալիքների հիմք չի պարունակում։ Սովորաբար պետք է իրականացվի որոշակի հետաքննություն, ներկայացվեն կատարվողի վերաբերյալ կոնկրետ մատնանշումներ և պարզաբանում, թե ինչի վրա է հիմնված այդ եզրահանգումը։ Եթե խոսքը գործակալական տվյալների մասին է, ապա պետք է լինի հղում դրանց, առնվազն՝ ինչ-որ ստուգելի տեղեկատվություն։ Եթե ես ունենայի ստուգելի տեղեկատվություն, կարող էի այդ մասին խոսել ավելի կոնկրետ, բայց քանի որ չունեմ, դժվարանում եմ ասել, թե ինչի հիման վրա է ԱՀԾ-ն խոսում հայաստանյան ընտրություններին ռուսական միջամտության մասին։ Իմ կարծիքով՝ Ռուսաստանն այս ընտրությունների համատեքստում շատ պասիվ դիրք է զբաղեցրել, և ես հիմքեր չեմ տեսնում ենթադրելու, թե գոյություն ունի ինչ-որ գաղտնի միջամտություն, գաղտնի զենք և այլն»,-այս մասին RegionsTV-ի հետ զրույցում հայտարարեց քաղաքագետ Հրանտ Միքայելյանը՝ մեկնաբանելով ՀՀ ԱՀԾ հայտարարությունը։

Հիշեցնենք, որ երեկ ՀՀ ԱՀԾ-ն հայտնել էր խորհրդարանական ընտրությունների նախաշեմին արտերկրում երկրի քաղաքացիների նկատմամբ գործադրվող արտաքին ճնշումների մասին։

Հայտարարության մեջ, մասնավորապես, ասվում է.«Արտաքին հետախուզության ծառայությունը ստանում է հետախուզական տեղեկություններ այն մասին, որ որոշ երկրում, հանդես գալով տվյալ պետության հատուկ ծառայությունների անունից, տարբեր անձինք փորձում են ճնշում գործադրել այդ երկրում տնտեսական գործունեություն ծավալող հայազգի անձանց և Հայաստանի Հանրապետության քաղաքացիների նկատմամբ՝ դրդելով նրանց քայլեր ձեռնարկել՝ ի նպաստ որոշ քաղաքական ուժերի, որոնք հայտարարել են Հայաստանում կայանալիք խորհրդարանական ընտրություններին մասնակցելու մտադրության մասին։ Այդ գործողությունները ներառում են, բայց չեն սահմանափակվում միայն վերոհիշյալ գործարարների կողմից այդ քաղաքական ուժերին ֆինանսական և կազմակերպչական աջակցություն ցուցաբերելով»։

Ընդ որում, հայտարարության մեջ չի հստակեցվում, թե կոնկրետ որ երկրի մասին է խոսքը։

Հրանտ Միքայելյանը կարծում է, որ ՀՀ ԱՀԾ հայտարարությունը մեծ կասկածներ է հարուցում, քանի որ նման հիբրիդային միջամտության որևէ ապացույց չկա. «Ես տվյալներ չունեմ։ Հետևաբար, Արտաքին հետախուզության ծառայության պարզունակ հայտարարության հիման վրա չեմ կարող եզրակացություն անել։ Ես կարող եմ դատել ծառայության զեկույցներով։ Կան ԱՀԾ զեկույցներ ամենամյա սպառնալիքների մասին։ Ես վերլուծել եմ 2025–2026 թթ. զեկույցները, որտեղ հրապարակված էին սպառնալիքները, և եկել եմ այն եզրակացության, որ դրանցում տեղ գտած հետևություններն ու տեղեկատվությունը անորակ են։ Դրանք չեն արտացոլում Հայաստանի Հանրապետության անվտանգային պատկերը։ Ուստի ես չեմ կարող վստահել այդ ծառայության խոսքերին»։

Նա հավելեց, որ «Արևմուտքի հիմնական նպատակը Փաշինյանի պարտությունը թույլ չտալն է, և դրա մասին գրեթե բացահայտ հայտարարում են բոլոր խոսնակները, փորձագետները, քաղաքական գործիչներն ու հանդիպումների հյուրերը։ Փաշինյանին ընդունում են ամեն օր, և բոլորը հայտարարում են աջակցության մասին։ Հաճախ նրանք դա քողարկում են որպես աջակցություն հայկական ժողովրդավարությանը, բայց չգիտես ինչու՝ հայկական ժողովրդավարությանն աջակցելը նշանակում է աջակցել ավտորիտար կառավարությանը, որի օրոք կան տասնյակ քաղբանտարկյալներ, ճնշումներ խոսքի ազատության նկատմամբ և այլն»։

Սովորական ընտրողի տեսանկյունից, ըստ Հրանտ Միքայելյանի գնահատականի, ընտրությունները պետք է լինեն ծրագրերի, գաղափարախոսությունների և սկզբունքների պայքար։ «Այժմ Հայաստանի իշխանությունները «սև» քարոզարշավ են իրականացնում ընդդիմության դեմ, մարդկանց բանտարկում են, համացանցում օգտագործում են հսկայական քանակությամբ բոտեր և ֆեյքեր։ Պայքարը, որը նրանք մղում են նախընտրական շրջանում, չի հենվում որևէ գաղափարախոսության կամ սկզբունքի վրա։ Մարդիկ սատարում են նրանց, ովքեր ուժ կամ քաղաքական տեխնոլոգիաներ են կիրառում իրենց ծրագրերն իրականացնելու համար՝ ոչ այնքան քաղաքական, որքան տեխնիկական առումով։ Ուստի ինձ համար շատ դժվար է ասել, որ անկախ ընտրությունների արդյունքներից՝ մարդիկ կաջակցեն Փաշինյանի ծրագրին։ Այժմ մենք տեսնում ենք շատ ակնհայտ պոպուլիստական քայլեր. հենց ընտրությունների շեմին ընտրողների «կաշառում»՝ թոշակների բարձրացման տեսքով»,-ասաց Հրանտ Միքայելյանը:

Զաբելա Ավագյան