Անբնական իրավիճակ է. Ֆրանսիայի Սենատը բանաձև է ընդունում, հայկական կողմից որևէ քայլ չկա. քաղաքագետ
Այս իշխանությունն ամեն ինչ արել և շարունակում է անել՝ նպաստելու Ադրբեջանի այն մոտեցմանը, որ Արցախի հարցն այլևս գոյություն չունի և անիմաստ է այդ մասին խոսել: Նման կարծիք հայտնեց քաղաքագետ Աննա Կարապետյանը:
Նրա խոսքով՝ պետական մակարդակով որևէ իրական քայլ չի արվում վերադարձի հնարավորությունը քննարկելու ուղղությամբ.
«Այսօր կարիք կա համախմբելու Հայաստանի, Սփյուռքի բոլորն այն ուժերի ռեսուրսը, որոնք ի զորու են ձայն բարձրացնել, օրակարգ բերել արցախահայության հարցը: Մենք այսօր տեսնում ենք շատ անբնական իրավիճակ, երբ Ֆրանսիայի Սենատը բանաձև է ընդունում, խոսում, պնդում, որ Ադրբեջանի դեմ սանկցիաներ պետք է կիրառվեն, հիմքում դնում է նաև արցախահայության վերադարձի իրավունքը, Եվրոպական կառույցներից պարբերաբար այս մասին հայտարարություններ են հնչում, սակայն հայկական կողմից որևէ քայլ այս ուղղությամբ չենք տեսնում»:
Փորձագետի խոսքով՝ առանց Արցախի հարցի վերջնական լուծման, Երևանն ու Բաքուն իրական խաղաղության հասնել չեն կարող.
«Հնարավոր է պայմանագիր կնքվի, նրանք որոշեն տնտեսապես համագործակցել, բայց դա չի նշանակում հակամարտության կարգավորում, որովհետև հակամարտությունը հնարավոր է կարգավորված համարել այն պարագայում, երբ բոլոր խնդիրները լուծված են, բոլոր իրավունքները պաշտպանված են»:
