Մուխիկան իր իշխանությունն առանց աչքը թարթելու, համեստաբար հանձնեց Վասկեսին. Սերժ Սարգսյանը ևս աչքը չի թարթի…
Մարտ 02,2015 11:55
Լատինական Ամերիկայի ամենալիբերալ պետության ճարտարապետ, Ուրուգվայի նախագահ Խոսե Մուխիկան պաշտոնը հանձնեց Տաբարե Վասկեսին:
Աշխարհի «ամենաաղքատ» նախագահը համարվող Մուխիկան հեռացավ գլուխը բարձր, պարզճակատ՝ իր տեղը զիջելով մասնագիտությամբ բժիշկ Տաբարե Վասկեսին: Մուխիկան այդպես էլ չսիրեց «աշխարհի ամենաաղքատ նախագահ» արտահայտությունը, քանի որ, ըստ նրա, աղքատ են հենց նրանք, ովքեր իրենց շրջապատում են անհավատալի շքեղությամբ, ինչի հետևում թաքնված է հոգեկան և բարոյական դատարկությունը:
2014թ.-ի հուլիսի 9-ին Սերժ Սարգսյանը բախտ ունեցավ տեսնել Խոսե Մուխիկային՝ իր հայրենիքի նման փոքր երկրի, իր պաշտոնի նման մեծ պաշտոն զբաղեցնող, իր նման ոչ բարձրահասակ, ճերմակահեր ուրուգվայցուն: Ընդհանրություններն այսքանով թերևս սպառվում են, երբ աչքի ես անցկացնում ու վերլուծում նրանց անցած ուղին, նրանց ապրած կյանքը, ապրելակերպն ու կենցաղավարությունը:
— Մուխիկան թաքցնելու ոչինչ չունի: Դառնալով նախագահ՝ նա հրաժարվեց շքեղ պալատից, տեղավորվեց մայրաքաղաք Մոնտեվիդեոյի մոտակայքում գտնվող ֆերմայում, ապրում է մեկ ննջասենյակ ունեցող համեստ տան մեջ: Սերժ Սարգսյանը նույնպես ապրում է, ու միայն այսքանը…
-Մուխիկան վարում է 1987թ.-ի արտադրության ավտոմեքենա: Նրա թիկնազորը բաղկացած է 2 ոստիկաններից, ովքեր ձանձրանում են դեպի ֆերմա տանող ճամփեզրին: Սերժ Սարգսյանը նույնպես թիկնազոր ունի, ու միայն այսքանը…
— 78-ամյա նախագահն ազատ ժամանակն անցկացնում է փոքրիկ այգում: Բուժզննման համար հաճախում է գյուղական պոլիկլինիկա, սնունդը գնում է սովորական փոքրիկ խանութից: Սերժ Սարգսյանը նույնպես ժամանակ է անցկացնում, գնում բուժզննման, բայց հաստատ ոչ թե Ախուրյանի կամ, ասենք, Ուջանի պոլիկլինիկա, այլ Բադեն-Բադենի, ու միայն այսքանը…
-Մուխիկան իր քաղաքական կարիերան սկսել է Տուպամարոս կոչվող պարտիզանական մարքսիստական շարժման շարքերում: Նրա խմբի անդամները ռոբինհուդյան ոճով հարուստներից ու բանկերից գումար էին վերցնում ու բաժանում ընչազուրկներին: Սերժ Սարգսյանի ղեկավարած երկրում նույնպես կան հարուստներ, բանկեր և ընչազուրկներ, ու միայն այսքանը…
-Մուխիկայի կառավարման տարիներին Ուրուգվայը դարձավ առավել անվտանգ երկիր: Դա համընկավ Սերժ Սարգսյանի կառավարման տարիների հետ, ու միայն այսքանը…
-Երբ Սարգսյանը բախտ ունեցավ տեսնել Մուխիկային, նրանք խոսեցին Հայաստանի և Ուրուգվայի միջև առկա ջերմ բարեկամական հարաբերությունների մասին: Իսկ օրվա ավարտին միասին ճաշեցին աշխարհի «ամենաաղքատ» և «ամենա…» նախագահները, բաժակ բարձրացրին իրենց ժողովուրդների բարօրության համար, ու միայն այսքանը…
-Մուխիկան իր իշխանությունն առանց աչքը թարթելու, համեստաբար հանձնեց Վասկեսին, և այդ իշխանությանը ոչ մի բան չի սպառնա: Սերժ Սարգսյանը ևս աչքը չի թարթի, եթե իշխանությանն ինչ-որ բան սպառնա, ու միայն այսքանը…
-Մուխիկային երբևէ չեն մոռանա, և ոչ միայն ուրուգվայցիները, ովքեր իրենց արդեն նախկին նախագահին հարգում ու սիրում են բացառիկ անկեղծության, համեստ ապրելակերպի, իր ժողովրդի աշխատանքն ու վաստակը գնահատելու և խնայելու համար: Սերժ Սարգսյանին նույնպես չեն մոռանա, ու միայն այսքանը…
Ուրուգվայցի քաղաքական վետերան Տաբարե Վասկեսը խոստացել է շարունակել այն բարեփոխումները, որոնք իրականացվել են վերջին 10 տարիներին, սակայն հիմնական այն բարեփոխումը, որն իրականացրել է նրա նախորդը՝ Խոսե Մուխիկան, իր ժողովրդի, մեր բարեկամ ուրուգվայցիների սրտերում ու հոգիներում, թերևս անհասանելի կլինի Վասկեսին, և ոչ միայն նրան:
