Գյումրու քաղաքապետի ԺՊ-ի թեկնածու ինքնառաջադրված Դավիթ Առուշանյանը մյուս ինքնառաջադրվածի՝ Աննա Հակոբանի ազգականի և ընտրությունների մասին

Գյումրու համայնքապետի ժամանակավոր պաշտոնակատարի նախնական ընտրություններում ինքնառաջադրված ՔՊ-ական պատգամավոր Դավիթ Առուշանյանն անդրադառնալով  այդ ընտրությունների գործընթացին, ասում է՝ որևէ գյումրեցի ներգրավված չէ այս գործընթացում՝ անաչառությունն ապահովելու համար

ԱԺ ՔՊ խմբակցության պատգամավոր Դավիթ Առուշանյանը, որն ինքնաառաջադրվել է Գյումրու համայնքապետի ժամանակավոր պաշտոնակատարի ընտրություններում, այսօր խորհրդարանում լրագրողների հետ ճեպազրուցում անդրադարձավ նախնական ընտրությունների գործընթացին, օրինակ՝ քանի՞սն են առաջադրվել  որպես Գյումրու քաղաքապետի ԺՊ-ի թեկնածու։

«Գործընթացն ամբողջությամբ կազմակերպել է կուսակցության վարչությունը․«Որևէ գյումրեցի ներգրավված չէ այս գործընթացում՝ անաչառությունն ապահովելու համար։ Տեղեկատվությանը չենք տիրապետում։ Վարչապետն ասել է, որ վաղն են հրապարակելու, թե ովքեր են մասնակցելու»,-ասաց Առուշանյանը։

Ինչպե՞ս է գնահատում իր հաղթելու հնարավորութուններն, այս հարցին ի պատասխան նա ասաց՝ գյումրեցին է գնահատելու, գյումրեցին է տալու այդ մանդատը․« Չեմ կարող ասել։ Գյումրին յուրահատուկ քաղաք է՝ Գյումրին կամ շատ սիրում է կամ չի ընդունում և բարդ է հասկանալ, թե դու որ սեգմենտի մեջ ես։ Գյումրեցիներն իրենք կորոշեն, թե ում են տեսնում՝ որպես քաղաքի ժամանակավոր պաշտոնակատար, որովհետև որքան էլ անունը դնենք իրավաբանորեն լինի ժամանակավոր պաշտոնակատար, ինքը որոշ ժամանակահատված քաղաքապետ է լինելու, և այս այս գործընթացը ևս մեկ քայլ է դեպի ժողովրդավարություն»։

Դիտարկմանը՝ լուրեր կան, որ առաջադրվածներից ամենամեծ հնարավորությունն ունի Աննա Հակոբյանի ազգականը՝ Վահագն Մկրտչյանը, Դավիթ Առուշանյանը պատասխանեց՝  «Դա լինելու է խիստ անաչառ, վերահսկելի և այն, ինչ փորձում են շահարկել պարոն Մկրտչյանի անվան, ազգակցական կապերի հետ կապված, այս պարագայում որևէ ազդեցություն չի ունենալու և եթե պարոն Մկրտչյանն ունի լայն համախոհություն գյումրեցիների կողմից, ուրեմն ինքն էլ ընտրվելու է»։

Դիտարկմանը՝ ժողովրդավարությունից եք խոսում, բայց Նիկոլ Փաշինյանը գործադիրի անդամներին անձամբ խնդրել է աշխատանքից ազատման  դիմում գրել, այն էլ՝ sms հաղորդագրությամբ, նաև՝ ընտրված մարմնի անդամներին՝ Աժ պատգամավորներ Նարեկ Զեյնալյանին և Հովիկ Աղազարանին, Առուշանանը պատասխանեց․«Իսկ գուցե կուսակցության ղեկավա՞րն է ուղարկել հաղորդագրություն։ Այն կուսակցության ղեկավարը, որն այսօր իշխողն է ու նաև վարչապետն է։ Մենք ի՞նչ գիտենք՝ վարչապետը ուղարկել է հաղորդագրություն՝ որպես վարչապե՞տ, թե որպես կուսակցության ղեկավար։ Հարց էլ է՝ sms ուղարկե՞լ է, թե զրուցել է։ Օրինակ՝ ես ընկալել եմ՝ որպես կուսակցության ղեկավարի խնդրանքն իր կուսակից ընկերոջը»։

Նա հրաժարվեց գնահատական տալ՝ արդյոք Աղազարյանը կամ Նարեկ Զենալյանը որպես ընտրված պատգամավոր պետք է մանդատը վայր դնեն՝ գործադիրի ղեկավարի խնդրանքով կամ պահանջով։