Հաշմանդամություն ունեցող անձանց խնդիրների մասին REGIONS TV-ի լուսաբանումներն արժանացան մրցանակների
Հաշմանդամությունը հաջողության հարցում խոչընդոտ չէ, ցուցադրվեցին հաշմանդամություն ունեցող կանանց ձեռքբերումներն ու ձգտումները:
Հաշմանդամություն ունեցող անձանց մատչելի միջավայրի, կրթության, զբաղվածության և ներառականության ապահովման խնդիրները Հայաստանում լիարժեք լուծում չեն ստացել: Պետությունը թեև միացել է միջազգային մի շարք կոնվենցիաների, նաև օրենսդրական դաշտն է բարելավել այդ ուղղությամբ, բայց գործնական քայլերը դեռ բավարար չեն հաշմանդամություն ունեցող անձանց անգամ ազատ տեղաշարժը երկրում ապահովելու համար:
Հաշմանդամություն ունեցող մարդկանց տաղանդները, ներուժը ընդգծելու, նաև նրանց առջև ծառացած մարտահրավերները բարձրաձայնելու ուղղությամբ «Ագաթ» հաշմանդամություն ունեցող կանանց իրավունքների պաշտպանության կենտրոնը բավականին լուրջ աշխատանք է տանում արդեն երկար տարիներ:
Այս անգամ, հաշմանդամություն ունեցող անձանց իրավունքների պաշտպանության միջազգային օրը, կազմակերպությունը նախաձեռնել էր «Առաջնորդությունը և ներառականությունը սկսվում է մեզանից» խորագրով լուսանկարների ցուցահանդես, որտեղ ցուցադրվեցին հաշմանդամություն ունեցող կանանց ձեռքբերումներն ու ձգտումները: Ցուցահանդեսը միտված էր ոգեշնչել և ցույց տալ, որ հաշմանդամությունը հաջողության հարցում խոչընդոտ չէ:
Իսկ Գյումրու մտորումների թատրոնի «Ստվերներից այն կողմ» ներկայացումը օրինակն էր այն բանի, թե հաշմանդամություն ունեցող կանայք ինչպես են հաճախ անտեսում իրենց փորձառությունները ու թերագնահատում իրենց ներուժը:
«Ագաթ» ՀԿ-ի և մի շարք այլ կազմակերպությունների անցկացրած դասընթացներին մասնակցած լրագրողներն ու բլոգերները հաշմանդամության հիմնախնդիրներն էին լուսաբանել ու իրենց աշխատանքները ներկայացրել մրցույթին:
REGIONS TV-ի մրցույթին 2 հոդված էր ներկայացրել։ Մեր նախկին թղթակից Ելենա Ավետիսյանն ու Կարինե Կազարովան իրենց հոդվածներում ներկայացրել էին հանրապետությունում գործող խնամակալության համակարգում եղած բացթողումները և հաշմանդամություն ունեցող անձանց տրամադրվող անձնական օգնականի ծառայության անհասանելիությանն առնչվող խնդիրները: 2 աշխատանքն էլ մրցանակների արժանացան:
«Լավագույն հոդված» անվանակարգում հաղթող ճանաչվեց Կարինե Կազարովայի «Անձնական օգնականի ծրագրից հաշմանդամություն ունեցող հազարավոր մարդկանցից ընդամենը 100-են օգտվում․սահմանափակումները շատ են» հոդվածը։
