«Արագացնել Գյումրու ավագանու արտահերթ ընտրությունները»․ Գյումրու ՀԿ-ների ներկայացուցիչների կոչն է կառավարությանը

Գյումրու քաղհասարակութունը կառավարությունից պահանջում է արագացնել Գյումրու ավագանու արտահերթ ընտրությունները՝   քաղաքական ուժերի համար  ապահովելով հավասարություն ընտրապայքարում, չեզոքացնելով բոլոր հնարավոր ապօրինությունները և ստվերային ֆինանսական հոսքերն այդ ընթացքում

Գյումրիում ստեղծված կառավարման ճգնաժամի, նաև համայնքային իշխանության շուրջ հնարավոր զարգացումների մասին  իրենց մտահոգությունն են հայտնել  քաղաքի մի շարք հասարակական կազմակերպություններ, հասարակական գործիչներ։ Նրանք Ժուռնալիստների «Ասպարեզ» ակումբում քննարկման ժամանակ փորձել են իրավիճակից դուրս գալու լավագույն ելքեր առաջարկել՝ ինչպես քաղաքի կառավարումը պատշաճ ու արժանապատվորեն վերականգնել։

Գյումրու ավագանու «Ապրելու երկիր» խմբակցության ղեկավար Կարեն Մալխասյանի կարծիքով՝ ճիշտ չէ մտածելը, թե ամեն ինչ կանխորոշված է։ Նա օրինակ է բերեց ՏԻՄ նախորդ ընտրությունները, երբ «Քաղաքացիական պայմանագրի» ցուցակը գլխավորում էր Շիրակի նախկին մարզպետը, այդ ժամանակ ՔՊ-ն չկարողացավ բավարար ձայներ հավաքել, որպեսզի մեծամասնություն կազմեր ՏԻՄ-ում։ Հիշեցրեց՝ ստիպված էին կոալիցիոն հուշագիր ստորագրել  «Բալասանյան դաշինք»-ի հետ և համատեղ իշխանություն ձևավորել։

«Այդ հուշագրից մենք էլ, իրենք էլ, բան չենք հասկացել, իսկ «Բալասանյան դաշինք»-ի հեռանալու նախադեպը ստեղծել  է ՔՊ-ն»,- շարունակում  է Կարեն Մալխասյանն ու հայտնում․ «Ես 13 օր առաջ դիմել  եմ  կառավարություն, որ դադարեցնի Գյումրու ավագանու գործունեությունը, բայց մինչև հիմա պատասխան չկա։ Հասկացել  եմ, որ իրենք գնում են այլ՝ օրենքը փոխելու ճանապարհով, ինչը ճիշտ չէ։ Իսկ փրայմերիզ անցկացնելը, ներկուսակցական հարց է, որը հանրայնացնելու մեջ թաքնված քարոզ կա՝  միտված ՔՊ-ի վարկանիշը բարձրացնելուն»։

Սախարովի անվան մարդու իրավունքների պաշտպանության հայկական կենտրոնի Շիրակի տարածաշրջանային մասնաճյուղի ղեկավար Սեյրան Մարտիրոսյանի դիտարկմամբ՝ ամենաճիշտ ուղին Գյումրիում  հնարավորինս շուտ արտահերթ ընտրությունների կազմակերպումն  է, ընդ որում, բոլոր քաղաքական ուժերի համար խաղի նույն կանոններով։

Գյումրու ավագանու ՔՊ խմբակցության նախկին անդամ Արման Բաղդասարյանն էլ նշեց, որ Գյումրիում ՏԻՄ ընտրություններին քաղաքացիների մասնակցությունն այնքան ցածր է, որ օբյեկտիվ արդյունք ստանալ հնարավոր չէ․«Հասարակությունը չի ընկալում ավագանու դերի կարևորությունը։ Իսկ փրայմերիզի արդյունավետությունը թերևս այն է, որ բացահայտվեցին ֆեյք ընդդիմադիրները»։

«Կոմպասս» ՀԿ ներկայացուցիչ Արտաշես Բոյաջյանն էլ  նշեց, որ ուշ, թե շուտ այսպես պետք է լիներ, քանի որ իշխող ուժը քաղաքականություն է մտել  ոչ թե արժեհամակարգով, այլ սեփական շահերով  առաջնորդվելով․«Իշխանությունը խնդիր է դրել  վերարտադրվելու , ոչ թե քաղաքի շահերն առաջ տանելու։ Վախենում  է, որ չի կարողանա բավարար քվեներ հավաքել  մեծամասնություն կազմելու, դրա համար էլ ուզում է ժամանակ շահի, փրայմերիզ անելով համայնքի ղեկավարի ժամանակավոր պաշտոնակատար նշանակի, որ հետո էլ, մինչ ընտրությունները,  հասցնի ինչ-ինչ ռեսուրսներ կուտակի։ Դրա համար ավելի լավ է արտահերթ ընտրություններ հայտարարվի, քան ձգձգվի»։

«Ժառանգություն» կուսակցության Շիրակի մարզային կառույցի պատասխանատու Վահագն Հովհաննիսյանի խոսքով՝ հասարակության մոտ տեղեկատվության պակաս կա։ Մարդիկ շատ իրադարձություններից անտեղյակ են։

«Այս 6 տարին երի ընթացքում կարծես ինֆորմացիոն բլոկադա է ստեղծվել, փակ է ինֆորմացիան։ Իշխանությունը շատ սխալ դիրքորոշում է որդեգրել։ Այս տարիների ընթացքում ոչինչ  չարվեց, իսկ հիմա ուզում են իրենց «մարդուն»  նշանակել, ինչը շատ վատ է»,- ասաց Վահագն Հովհաննիսյանը։

Հայաստանի պետական տնտեսագիտական համալսարանի Գյումրու մասնաճյուղի տնօրեն Կարեն Պետրոսյանի խոսքով էլ՝ բոլորի խնդիրն է ազդել այս անկառավարելի վիճակի վրա։ Գյումրիում, ըստ Կարեն Պետրոսյանի,  չլուծված շատ խնդիրներ կան։ Նա առաջարկում  է ստեղծել  սոցիալական բաց հարթակ, որտեղ  այդ խնդիրները կներկայացվեն։ Կարեն Պետրոսյանը մտավախություն ունի, որ ՔՊ-ից ընտրված համայնքապետի ժամանակավոր պաշտոնակատարը կարող է ազդեցություն ունենալ  ընտրությունների ելքի վրա։

Ըստ ներկաների՝ որքան ուշանան արտահերթ ընտրությունները, այնքան ավելի շատ է քաղաքը տուժելու։ Նրանք կարծիք հայտնեցին, որ կոալիցիոն կառավարումը Գյումրիում աչքի չի ընկել որևէ նշանակալի հաջողությամբ, համայնքային հիմնախնդիրները չեն լուծվել, այդ քաղաքական ուժերը, ստանալով ընտրողների քվեները, ըստ էության, չեն կատարել  իրենց նախընտրական խոստումները, անարդյունավետ կառավարումն ի վերջո, հանգեցրել  է կոալիցիայի խզման։

Քննարկման մասնակիցները հնարավոր է հայտարարությամբ դիմեն կառավարությանը, որով կոչ կանեն  իշխանություններին արագացնել Գյումրու ավագանու արտահերթ ընտրությունները՝ քաղաքական ուժերի համար  ապահովելով հավասարություն ընտրապայքարում, չեզոքացնելով բոլոր հնարավոր ապօրինությունները և ստվերային ֆինանսական հոսքերն այդ ընթացքում։

Կարինե Կազարովա