ԶՊՄԿ-ի աշխատակիցները չեն ընդունում ղեկավարության՝ աշխատավարձերի 20% բարձրացման առաջարկը․ «Մարդավարի աշխատավարձ ենք ուզում, որ արժանի կյանքով ապրենք»
ԶՊՄԿ աշխատակիցները շարունակում են գործադուլը, պահնաջում են արժանապատիվ աշխատավարձ և անվտանգ աշխատանքային պայմաններ
Զանգեզուրի պղնձամոլիբդենային կոմբինատի (ԶՊՄԿ) աշխատողները արդեն 11 օր է՝ գործադուլ են անում, նրանք պահանջում են բարելավել իրենց աշխատանքային պայմաններն ու բարձրացնել աշխատավարձերը: Այսօր ցուցարարները հայտարարեցին՝ իրենց պահանջները կոմբինատի ղեկավարությունը չի բավարարում։
Աշխատողները բարձրաձայնում են, որ իրենց աշխատավարձը չի բավարարում անգամ նվազագույն կենսական կարիքների համար:
Նախաձեռնող խմբի անդամներից մեկը նշեց. «Ղեկավարությունը վստահ է, որ շարժումը մարելու է, դրա համար համբերատար սպասում են, որ մարի, իրենք էլ անցնեն իրենց գործին։ Մենք վճռական ենք մեր որոշման մեջ, իսկ նրանք արդեն շանտաժով են խոսում մեզ հետ։ Ես չեմ ընդունում, որ ինձ հետ պատժի լեզվով խոսեն։ Նրանք պետք է հաշվի նստեն մեր իրավունքների հետ»:
20 տարվա աշխատանքային փորձ ունեցող աշխատակիցներից մեկը պատմեց երկար տարիների դժվարությունների մասին. «Մարդիկ օր ու գիշեր են աշխատում, կյանքը տվել են աշխատանքին, առողջությունը կորցրել։ Մեր աշխատավարձով էլ մենք նորմալ կյանք չենք կարողանում ապրել։ Ժողովուրդը ուզում է իր հոգու ճիչը բարձրաձայնել՝ պահանջում է մարդավարի աշխատավարձ, որ կարողանանք ապրել արժանի կյանքով։ Ոչ մեկս չենք ուզում միլիարդատեր դառնալ, պարզապես ուզում ենք բարեկեցիկ կյանքով ապրել։»
Երթից առաջ «Զանգեզուրի պղնձամշակման կոմբինատ»-ի ղեկավարությունը հայտարարություն է տարածել, կոմբինատի ղեկավարությունը վստահեցնում է , որ ընդհանուր աշխատավարձային ֆոնդը կբարձրանա միջինը 20 տոկոսով։ Կատարվելու է նաև մի շարք բարեփոխումներ՝ ընտրելով նոր ապահովագրական ընկերություն, որը կապահովի աշխատակիցների պահանջներին համապատասխան բարձրորակ ծառայություններ։ Կոմբինատի ղեկավարությունը խոստանում է տեղադրել բարձր արդյունավետությամբ օդափոխության և ասպիրացիայի համակարգեր, ուստի կոմբինատը դիմել է աշխատակիցներին՝ կոչ անելով վերադառնալ աշխատանքի։
Մինչդեռ գործադուլի մասնակիցներին չի բավարարում կոմբինատի ղեկավարության խոստումները, նրանք այսօր հայտարարեցին՝ աշխատավարձի 20% բարձրացումը չի փոխելու իրենց սոցիալական վիճակը:
Հիշեցնենք, որ աշխատակիցները պահանջում են աշխատավարձերը բարձրացնել 50%-ով։
Վերջին տարիներին ԶՊՄԿ-ի ղեկավարությունը մի քանի անգամ բարձրացրել է աշխատավարձերը, բայց աշխատակիցները կարծում են, որ դրանք չեն համապատասխանում տեղի ունեցած թանկացումներին։
«2018 թվականին իմ աշխատավարձը բարձրացել էր մոտ 60%-ով, որի համար շատ գոհ ենք, սակայն այսօր այն չի բավարարում նույնիսկ առօրյա ծախսերին: Ասում են՝ 20 տոկոս կբարձրացնեն, բայց իրականում միայն 5 կամ 10 տոկոս է ավելանում, կամ նույնիսկ իջնում է»,- հավելեց աշխատակիցը:
Սյուզաննա Խառատյան
