«Երեխաների հարաբերությունները ամբողջովին կարգավորվել են, ծնողների միջև ևս որևէ կոնֆլիկտ չկա»․ Զորականի համայնքապետն աղմկահարույց ծեծի մասին

«Բոլորս էլ մեղավոր ենք, բոլորս էլ մեզ վատ ենք զգում: Ով մեղավոր է, կստանա իր պատիժը: Բայց բացառված է, որ դեպքը շարունակություն ունենա: Էդ էլ ստացվել է, որովհետև մեր աչքից հեռու էր, մեր տարածքում չէր»,-ասում է Զորական համայնքի վարչական ղեկավար Սուրեն  Մարտիրոսյանն՝ անդրադառնալով համայնքի անչափահասների մասնակցությամբ դաժան ծեծին։

Հիշեցնենք, որ նոյեմբերի 27-ին ֆեյսբուքյան օգտատեր Նանար Պողոսյանը իր էջում տեսանյութ էր հրապարակել, որտեղ Զորական գյուղի բարձր դասարանի 5  աշակերտ հայհոյում, դաժան ծեծի են ենթարկում մեկ այլ անչափահասի՝  Նոյեմբերյանի պետական քոլեջի ուսանողի: Դեպքը տեղի է ունեցել սեպտեմբերին, այդ ժամանակ ծեծի ենթարկվողն անչափահաս էր, նա երեկ դարձավ 18 տարեկան։

Դեպքի  առթիվ քրեական վարույթ է նախաձեռնվել սեպտեմբերին: Ըստ Քննչական կոմիտեի՝  տղաներից մեկը կալանավորվել է 1 ամսով, 3-ի նկատմամբ կիրառվել է 20-օրյա կալանքը, մեկի նկատմամբ՝ տնային կալանքը: Կալանքի ժամկետը լրանալուց հետո բռնության մասնակից 3 անչափահասներն այժմ ազատության մեջ են: Վարույթը շարունակվում է:

Զորականի համայնքապետ Սուրեն Մարտիրոսյանը RegionsTV-ի հետ զրույցում նշում է, որ  դեպքը տեղի է ունեցել համայնքի տարածքից դուրս, Նոյեմբերյանում։ Դեպքի մասնակիցներից միայն երկուսն են մեր դպրոցի աշակերտներ, մնացածը քոլեջի սաներ են, կողքի համայնքներից: Գնացել են Wildberries, երեխեքից մեկն ասել է՝ էսինչը քեզ քֆուր է արել: Հենց էդտեղից էլ միջադեպը սկսվել է»:

Տարածված տեսանյութում հստակ լսվում է, թե ինչպես է ծեծող անչափահասը բռունցքներով ու ոտքերով հարվածելով զոհին հարցնում՝ «դո՞ւ ես պահակին իմ անունը տվել»։  Ծեծի ենթարկվող անչափահասն էլ անընդհատ կրկնում է, թե ինքը անուն չի տվել։

Համայնքապետն ասում է, որ այս դեպքի մասին երեխաներից ոչ մեկը որևէ մեկին չի պատմել, մինչև այն պահը, երբ տեսանյութը տեսել են տուժող երեխայի ծնողները. «Երեխեքից ոչ մեկը ծպտուն չի հանել: Ընթացքում, ով որ նկարել է, տեսանյութը փոխանցել է մեկ ուրիշին, նա էլ ցույց է տվել տուժողի ծնողին, ով էլ հենց բողոք է ներկայացրել ոստիկանություն: Նկարողը ևս մեր գյուղից չէ, Նոյեմբերյանի քոլեջի սան է»:

Համայնքի ղեկավարը վստահեցնում է, որ այս պահին դեպքի մասնակիցների հարաբերությունները ամբողջովին կարգավորվել են, ծնողների միջև ևս որևէ կոնֆլիկտ չկա. «Դեպքից հետո Ա․-ն մի քանի անգամ եկել է, երեխաները ներողություն են խնդրել, ծնողները ներողություն են խնդրել: Այսօր էլ նրա 18 ամյակն էր, նորից մեր համայնքում էր»:

Սուրեն Մարտիրոսյանը տեղեկացրեց, որ դեպքի մասնակիցներից այս պահին կալանքի տակ գտնվում է միայն մեկը, մյուսներին բաց են թողել 2 օր առաջ։

Համացանցում այս միջադեպն ակտիվ քննարկվում է, պարզվում է, որ ծեծի ենթարկող երեխան «Արթիկ» քրեակատարողական հիմնարկի պետի տեղակալ Ռուբեն Գասպարյանի որդին է։ Գասպարյանը պետի տեղակալ է նշանակվել հոկտեմբեր ամսին, իսկ արդարադատության նախարար Սրբուհի Գալյանը հայատարարել է, որ երեխաների ծեծի մասին տեղյակ է եղել սեպտեմբեր ամսից։ Քաղաքացիները վրդովված են՝ եթե միջադեպի մասին նախարարը տեղյակ է եղել, ապա ինչո՞ւ է նրան նման պաշտոնի նշանակել։

Ծեծի ենթարկված երեխայի հայրը լրատվամիջոցների հետ զրույցում դժգոհել է, որ որդու ծեծի տեսանյութն այդքան մեծ տարածում ու հնչեղություն է ունեցել, նա նշում է, որ շատերը կճանաչեն որդուն․«Ամոթ է, ինձ համար էլ է ամոթ, գյուղի համար էլ, իմ երեխայի համար էլ»։ Հայրը նշել է, որ ծնողները և երեխաները այժմ իրար հետ նորմալ հարաբերություններ ունեն, որ «գյուղացի մարդիկ ենք, մի կտոր հաց միասին կիսող մարդիկ ենք, մեր հարցերը կարող ենք ներքին համաձայնությամբ լուծել»։

«Դեռահասների վարքի ամենաբնորոշ հատկանիշներից մեկը մեծահասակների վարքի մոդելավորումն է»,-այս կարծիքին է հոգեբանական գիտությունների թեկնածու, դոցենտ Հայկուհի Կնյազյանը։

Մեզ հետ զրույցում հոգեբանն անդրադառնալով միջադեպին, ասում է՝ դեռահասների շրջանում նման դեպքերի տարածումը պայմանավորված է հասարակության ազդեցությամբ, նշում է՝ մեծահասակների մոտ դրսևորվող ագրեսիան դեռահասները ընդօրինակում են նույնությամբ։

«Այն, ինչ իրենք տեսնում են նրանց մոտ, ընդունում են որպես մոդել, և սկսում ձևավորել նմանատիպ վարք: Դա էլ հենց շատ հաճախ դառնում է ագրեսիայի դրսևորման պատճառ: Դեռահասների մոտ դեռ լիովին ձևավորված չեն վարքի կարգավորիչներն ու արժեքային նորմերը, դրա համար նրանք շատ արագ կարող են ազդեցության տակ ընկնել: Իրենք մտածում են, թե այն «լավ տղաներն են», ովքեր կարող են ինչ-որ մեկի նկատմամբ այնպիսի դաժան վերաբերմունք ցուցաբերել, ինչպես մեծահասակները»:

Կնյազյանի կարծիքով՝ մեդիայով ու հեռուստատեսությամբ տարածվող ագրեսիվ կերպարներն ու բռնության տեսարանները ևս ազդեցություն են թողնում․ «Դեռահասը հետ է վերադարձնում այն արժեքային համակարգը, որը դու տալիս ես նրան: Վերջին շրջանում դեռահասները հեռացել են դպրոցից ու կրթությունից: Եթե երեխաների հետաքրքրության կենտրոնում դպրոցը չէ, նրանք կզբաղվեն ամեն ինչով, որպեսզի բավարարեն իրենց հետաքրքրությունը, իսկ մեր այսօրվա իրականությունը ցավոք բռնությունն ու ագրեսիան են: Ամենաթարմ օրինակը վերջերս Աբովյանում երիտասարդի սպանությունն էր: Այսպիսով, եթե մենք չկարողանանք ուսումը նրանց համար գլխավոր արժեք դարձնել, այս «շղթան» կշարունակվի»:

Հոգեբանն ընդգծեց մեկ այլ կարևոր հանգամանք՝  հասարակության շրջանում դրսևորվող հուզական անտարբերությունն ու կարեկցանքի բացակայությունը․«Շատ կարևոր փաստ էր նաև այն, որ ինչ-որ մեկը կողքից նկարում էր, թե ինչպես են խոշտանգում երեխային: Լինել այդ ամենի լուռ դիտորդը, ոչ մի կերպ չմիջամտելով դրան, ևս խնդիր է: Հասարակությունը պետք է վերանայի իր արժեհամակարգը, դեռահասների համար պետք է լավ օրինակ լինել, միայն այսպես է հնարավոր կանխել նմանատիպ դեպքերի կրկնությունը»։

Նիկոլ Մարգարյան